Talteon me warzaca (suterot)
VildeksPaul Baümer tir sananyustdafe yikye kuranon vilteyene dum milpulikeem ke intafa olda, is banaf sayakik koe germanafa ervolia bak Taneafa Tamavageja. Belisik va in rungruper viele inafa rumala bal ruzadera su zo tsalar. Bata piza dere tir ervay : moblisik va vace ke xonukik fu mbi gad nume bexe fu estuckud. Kemmerich palik gu tan nimat su zo vigaber nume fure fu mulufter, lidamen jotaf Josef Behm lubeyes bal ruzadera. Bate yikye vilteyed, vebandanon gan Kantorek tavesik koenilteyes maneke milpulikeem ko kselduxo emavenon laniyir, stanon gan in. Oldik gu ervoliebik is tawadayik is dodelik zo aotceyed aze bate lukastiskafe yikye re tid guazaf sayakik. Abdida zo koredjelayad pune va sayakaxe is funtera levgayad, benplekunon gan Himmelstoss rizik vox wideyton piuteik, i gan ekavamakirik djoskaf is volmalyaf is fikaf anamsteges va jontik akoydaf funtes bartiv pu dostak, ant ariseteson va swava. Batcoba vol tir tugadiara gu kevaliera. Bogera koswana pu dirganikeem gan Himmelstoss tir gijapafa maneke darevielon gu koredjelara konaktan koe orikafa nuda va in ked aze kalaliersed. Keve redjel Paul va Katcinksy ikayolton gu Kat rungruper, i va loklaaf sayakik. Nucapa wal toloy sin vanblir. Alkejara ke ironokafa dilfura kevvebad da rumala gan iewaf milk di zo tugodjar, i gan bagaliskaf kseldunik volgrupes va lyumara. Kevaliera tid eaftafa : valey konendara kev bulira ke britanafa ik francafa kaburervolia, dilfura kan tie dere tid. Tie malstir, va sid moostir, va bete fe ke gelbes sayakik kostir, va iteem is rizeem ke meproyik waverson tiolteyes va xatcaxa anteyar. Gasiza is djoba is riliza dum onotca baliewed, awalkolafa roida talad ise dolisted, ise va cot sollipad ise va waleniskay kladad. Evie ke bakanik lubeyes vawal brimgaxo kamamad numen moblisik va viafa buktuca ke palik darpe bartiv az bartiv ugalad. Tamava ke olda ik sayakaxe tir sumefa numen kota benplekura re nutid giopafa isen grupera lindafa isen gransera pestiskafa. Batdume viele Himmelstoss rizik evodanon zo koredjelar, pune katecta tir wadarsafa numen dostakik vol veged. Viele pu fayik temer, pune nope nelkotack gunik bagon di zo ested neken rizik di zo cisteper. _poster.jpg) Finta ke elpat epuyun gan Lewis Milestone bak 1930 vey berpot ke Erich Maria Remarque Rekola koe taneafa conya va telyona tildesa radimifid. Valey lentef sayakik, ayik va ar volnik dikid : tovol kevidumb va beg. Azon enabrotcipafa kaburervoliafa bulira dilizer ; Paul is palik ludevon ice brava kurdanyed edje gasizapa dun baliewed. Konak warzik sure korumalayan ko oviskuca riwe belxad. Azon edje brutafa nonama tiskir, pune ruzadera ve sokir : kevelafa brimga zo vajiker, volnik malgimas va azil is tey mali yon bartiv tere zo wir ; acum kottan viltar, aytar, moldeyar, kan leakom va alto remgaber, va jivot flugar. Kotcoba kevwatason va abice metre ke walexesta. Warzik va batyona ruzadera nope mebagaliuca loeke urdad. Himmelstoss tir ke sin, voxen viele Paul va in vudalizin ludevon gu brava wir, pune benu tantazukot impar ise poar enide in gire di ruzader. Teni bata rekola koe taneafa conya, ant bar-san-toloy ayik fuxe tan-san-balem-sanoy al moblid. Paul va zananona belundar nume ko ebava tori abic viel dimlapir. Auzura koe vowidava va pokolena kaluca me tiskar : gadikya akoleper ise fu vetawalker ; kakevenikye va geltruca ke blira keve redjel vol rietad, isen Paul gan gunafa satolera zo tolgenir : nik zavzagis keve redjel lyumad solve int tir musedaf. Va coba impavantar nume va gadikya ke Kemmerich palik auzur voxe va ageltuca icde xonukera ke inafe nazbeye me lajurazdar : pu mila kimtikya rotuxadar, kalison da ine viltayane ko takra opelon lubeyer. Zananona tir abdi tiskira koe funteso pemaxo. Banlize va rossiaf stolenik kakever ise rabater da meka myodaca gu sin solparsar. Ostik va Kantorek evodanon katrasir, i va tavesik plataeyes va dalintafa viltera. Bantel su zo tixayar nume va olgafa blira koe sayakaxe tere grivuter, i va blira kalsiskeyena pu tavembik vox me djumugalayana. Paul kev redjel godimlapir. Tici mielafa fiera eglur aze koe gasizabuga gelber. Viele francafa ruzadera sokir, pune volnaf sayakik ko buga luber. Paul iper aze nubemar. Viele auluca gire artstir, pune in va lane ayikye milafe kosmar, i va ayikye di tiskise va konak bartiv kali awalkera. Va inaf yolt kou vobor raver : Gérard Duval rubias dodelik. Soloksaf volnik va yolt is gexata re dir. Paul va milkatcik su aytar nume va eaftafa gunuca satoler. Vanion silukon zo bakar aze ko vadimefe ropexe zo remburer. Inafa mejera is tela ke palikeem tid gijafa : xonuka is mulufta va bakanik belon dolisted.
Dere rupel
|
 Moek ke germanavafo xantofa piskura, 1929 | |||||||||||||||||
.svg){kind=icon}