Tamango (suterot)
VildeksLedoux redakik tir bagaliaf is tructaf totasik albas va intafa kobara. Tickir tuwarzas is abdufis. Va vegedura va lana wilttota ta ebeltikafa mordara bokar, i va tota yoltkirafa gfu Espérance ( Pokolera ). Vligus va ebeltik, va nyebuca lodam sinaf erod abdualbar : tota vas levetirik loon dam kotara roruldar. Espérance tota va Nantes van Senegala koulapir. Moi artlapira va afrikafa krimta, Ledoux redakik va vartaf afrikaf levetirikaf dolesik yoltkiraf gu Tamango kevlanir. Nope katecta ino va lolistafe blucte diskir, voxen wison francaf redakik va ino wetce rodolenyen levetirik anton kevtrakur. Tamango va yon levetirik atoer neken Ledoux va kot sin tantanon ewotar ; soe va yone loprantafe ayikye rebar ise pokoler da va yonare ika kipeafo dro di roturlicker, edje Tamango va telyon torigin wetce intaf doleks kalsisker. Kottol gu levetirikafo dro va sint me lajutuseylad : teni abrotcifa parloera sistepeyena gu lavajeb, Ledoux redakik va decem-tev-sanoy levetirik malurlicker. Zavzas rumeik isu guazik isu bewenjikya ika betafo dro pu redakik gan Tamango zo draged. Ledoux rietar da va darka ke tota loeke fu tunyebar nume va loplekuf rundanyas tol-sanoy olkik naler : ironokaf peroy kle zo balinafed. Tamango ikatcur da tantanon fu aytar vieli Ledoux redakik va sinafa kalustera di kevnaler. Lantanya va guazikye gradilon lagiwar : riyomegason Tamango va tcumivikya pu Ledoux redakik firvir voxe me vofar da va intaf yerumanik kozilir. Ironokaf levetirik gan parloes remstasik tere zo giwad. Diregazdon Tamango sonker da va Ayché yerumanik al zilir. Woltendano is ireglieso, va tota ke Ledoux artpujer voxen ban in va dimzilira va Ayché vewar. Nekev karakera is piksera ke Tamango, Ledoux me xaar : volson va Tamango ta dolera wetce levetirik djukukototar. Teni memiltafa lyumara, laspedafo Tamango gan levetirikaf redakik zo levrotir. Tamango zo stoler nume toz liner ; arak ke levetirikeem inon dagiyin gevanon dizver. Remlapira dilizer inde Ledoux pikseyer : ant san-toloy levetirik awalked. Poke redakik Ayché linular ton zanisik. Wison va batcoba Tamango tudagawer nume va dratcera gu yerumanik minjar : « Kas folil da koe patecta ke batakik Mama-Jumbo me tir ?~ evier » abdida Ayché ve mayabuwejer. Remstasik penur da « Mama-Jumbo » tir gulestusik ke ebeltik, i tumayasik ganduyun gan yerumanikye enide yerumanikya zavzar sagafa is teldafa. Ledoux metcedeson lagrivudesir va Ayché. Radimi perzaf mielcek, Tamango va yerumanik vanimpar ise va tiskara va rucasiki erur. Kenion va ar levetirik gu tarlera koldar ise abduplekur da radimi estera va redakik, va sin dimon di star. Levrotiyin gan uiveuca ke intaf daref felisik, levetirik va tunuyara azeded. Ayché va rucasiki tere lajuremplekur nume Tamango va bata jwa pu dositik nedir. Tunuyas viel artfir, azed guyundecker. Tamango toz vajiker aze kot birelik tantanon zo baservoar aze zo aytar. Divbusumayan levetirik va varaf drig lajufeliled aze Tamango arti forteyotafa toldoaliera va Ledoux redakik xonukesir. Kaiki stakera tota van siday ke levetiruca wan lapir numen ebeltik zo tuguyad. Tamango zo kostrur kire va tota me grustar. Soe va lana tiura yawar voxen batcoba nijur egale numen noriskeem ke Espérance joawer. Levetirik is Tamango is Ayché radeyed : yatkaf levetirik va Tamango biaged. Lan levetirik va vask ke lavajeb ke drig ke Ledoux kosmar : rundanyasikeem ke tota va int tugrijapar. Voxen sin diregazdon sonked da bali me al tukiewawer isen ostik konak bakanik al xonuked isen tota iste bira wan eliwer. Va vodjura va Espérance van vo gire yawad voxe me tceded. Numen va int gin tugrijad. Viel tiskid, jontik rundanyasik awalked. Tamango tere drager da sin va witka is tiv gorundanyad enide va vo di dimlapid. Levetirik tid odiakaf nume va felisik dirnud. Voxen tanoy likay isu witka anton tid warefa, i toloy totukam me koegiskis vas rundanyasikeem, numen lodaxaf levetirik zo jovled. Likay ke Tamango is Ayché belxar voxazen sin kal Espérance lajudimpujed. Toleafa witka illapir. Kas va afrikafa tadava konviele kallapitir ? Arti abic viel, Tamango is Ayché aelerson zavzad bocik moe tota azen Ayché dere tere awalker. Kadimion Tamango gan englafa gejatota zo koemuder. Mo siday gu kobara mu englafe bowere zo lanzar. Kaikion mulufter. Dere rupel
|
| ||||||||||||||||
.svg){kind=icon}