Tarlesikeem ke Bounty tota (suterot)

Tarlesikeem ke Bounty tota Tarlesikeem ke Bounty tota tir berpotam ke Jules Verne sanegayan bak 1879, tis tana karba ke Yona zultafa koyara nevatum. Koe Tarlesikeem ke Bounty tota, Jules Verne va gabenton vundafa tarlera koswar, i va tela ke Bounty tota dilizeyesa bak 1789. Rupa ke bata wilttota va gesta ke jontiktan al gestur. Batdume jontik nevaf ok elpataf zaleks va bata rupa krulded. Vildeks Jules Verne mali toza ke nega komar, munesteson va lana tarlera eksudayana gan Fletcher Christian ikaredakik ke Bounty tota. Lanmielon William Bligh redakik tis fayik ke englafa birervolia koe intafa mawa zo gralomer aze kabdu drig zo star enide va intaf tegieem is udutaf is krizaf linulareem tove drigik mali kodirgara va tota weti mon tolda di dulzoer. Solve yatkaf birelik va inafa vrayara volaun moimaxud, pune Christian va bali loeke eaftapafi pu aytcusin redakik al guzekar. Benplekur da Bligh is abic gusagas birik moe grocela koe totukam dem biwe abica bliga di zo jovled, i dem bliga tire mestapetesa ta jontikedje sinkara va likayikeem larde lopokefa krimta art 6700 km- tigir. Voxen Bligh tir mevialas is garfelaf olgik. Mano tuwavafo po ! Merofolinon, kaik bat kustof kind moo bira remi 47 lajurembliyir numaze ton kimtaf altosok arti 47 viel moe likay va Timor koe indonesiafa tursia artlapir. Viele ristula ke englafa birervolia gu bata tarlera zo givar, pune zauzera di tir boksafa. Christian is dositikeem il seltay govasked... Tarlesik moe bira toz krabed larde abdi bata exura ko vo mea rodimlapid, tid gomilasik. Dre : trelafa vox noafa nega Bat berpotam vas baroy luz ruldar. Taneaf luz va tarlera munester, toleaf va redakik is likayikeem suzdar, solve bareaf va bali ke tarlesikeem dulaper. Batkane, ton mon balem-sanoyu bu, Jules Verne osk va lana tarlera osk kareizur, voxosk va bali ke koredik remi konaka tanda iku oxila tove lantan dere kakdisuker. Koredik Tarlesik John Adams Fletcher Christian : ikaredakik ke Bounty tota Young : birelik Bob Churchill John Smith : trakopik ke blay Thompson James Morrison Vrulutanik Peter Heywood : levfayik ke tota Stewart : drigokilik Drigik jovleyen gan tarlesik William Bligh redakik : bagalakiraf vox figaf birik Fryer is Hallett is Thomas Hayward : fayik inton gusagayas mu Bligh redakik Birket is Millward is Muspratt : drigik Purcell : rentasik Bancroft : birelik raporgayan gan patectolik ke Tofoa Ar koredik Staines redakik : va moblisik ke tarlera koe Pitcairn ewala kosmar Peno : okilik ke Tahiti ewala Tippao : gazik ke Matavai Yunkexa Konaka yunkexa va berpotam, koe xantofa piskura, 1878 Dere rupel Jules Verne : Francavaf suterotik ( 1828-1905 ) (fr) Tarlesikeem ke Bounty tota, dene Wikisource ( xantokrent ) Kalkotavayan suterot Tarlesikeem ke Bounty tota ( Les Révoltés de la Bounty ), kalkot- 2013 gan Bruno Cordelier, Kotavaxak dem Suterot dotay, banliz Vuestexa

Tarlesikeem ke Bounty tota XANTO Vergumvelt Les Révoltés de la Bounty Sutesik Jules Verne Ava Francava Suterotinda Berpotam Evla 1878 betara teza   Tuveli icde Suteroteem  Yunkeks ke xantof piskuks