Tel taulesimbik va sorga (suterot)

Tel taulesimbik va sorga


Tel taulesimbik va sorga ( xantof englavaf vergumvelt : For Whom the Bell Tolls ) tir alubeaf piskuyun berpot ke Ernest Hemingway. Sanegayan bak 1940, va ilfafa bagala ke sutesik bal espanafa wideytafa geja koswar viele tiyir gejaf feladaalasik bene sokasanerotifa ervolia.

Tegira tici 1937-e dilizer, bal ironokafa egadara ke dilfura va Segovia stana gan sokasanerotifo po kev vedeyevaf milk. Redjel poke Navacerrada arte 50 km- lente Madrid tigir.

Vildeks

Robert Jordan, dalaf koredik ke berpot tir yikye dem amerikaf vedeyot, dise va altokuca ke stuvagradilik : « ontinafe is tigafe, dem latkaf usuk basksevan gan awalt is nadafa gexata, diskise va lamenaf rodagaf klaim is tawadayikafa rija is klebangeem ». Nekaze remi barda ke rupa ke berpot me di vagearur. Hemingway va ine kan varaf yoltack kotviele dasugdar voxen koredik yolton, gu Roberto va int atoer kotviele va espanik gamdar. Lo gejelusik gu Ingles ( englik ) yoltad. Sedme sin, amerikik ok englik tid milcoba. Bak 1936 ko Espana artlapiyir, lyumatason va torkevafo po ke Franco jadiwik ( inaf yolt koe berpot meviele zo ozwar ).

Dene tawadayafa anameda vey aludevafe zae koe izva ke Tanarasokeem kobliyir : veygadye dene abdigaldafa ervolia bak Wideytafa Geja lyumayar. Mali rumeugal, Jordan va nubokera va viltaxa raveyer. Tir tavunik : abdi artlapira ta lyumara va torkeva koe Espana, va Espanava koe lana kotla ke Montana galdolk taveyer. Viele gejelusik va batcoba zo givad, pune remi konaki kuparki va in gu Don Roberto yoltad : bane yikye tir ke lan poz volmilaf gu tel sinaf. Robert Jordan va Espana grupeper kire kotliz al exuler ise avunyur ise dace va lana neva icde intyona koyara koe Espana al sanegar. Karkov felusik pu in kalir : « Krupté da enagelton sutel isen batcoba tir riaca ». Ageltafa sutera en tir suterotaf mukot tentuyun gan Hemingway. Bat taneaf uum afton bazecked da Robert Jordan tir rietavaf momimaks va Hemingway, belcon tis suterotik nekis tegisik pokef gu tuwava lize a erod ke seltay va blira me kivar, is tis ayik gruon is lidon viltes num golapis liz coba dilized, liz geja tigir. Hemingway va kipi ke int ko koredik al rundar : sin toloy va poz ke geja is xonuka vanatced. Ara doaca : Roebrt Jordan koe Paris bliyir, dum Hemingway tiskiyis va konak aksat koe francafu kelu, ton benelafa rekola ke intafa suterotafa tazukara wetce bewik ke « Drasuna Oxila » dum Francis Scott Fitzgerald ok John Dos Passos. Robert Jordan va tciamafa fedja keveon beneon burer, i va fedja kotrafa gu konak laridacek dem diolafa plawa tisa krema, batkane egason va bilaga koe arula kabdue gejelusik : « Tanoy bilagacek dem bata ulida va sielfela ikaaykayar, i va kot gelkef sielcek tiskiyin koe zazda ik felak ik tcilaxe ik Montsouris gerd ik Buffalo utiuxo ik Buttes Chaumont gerd [...]: va kota coba albayana az vulkuyuna nek dimfisa kotviele va bata sfiafa is vlapafa razinda yoyayar, i va razinda tuglagasa va yoy vox tuidulasa va kerava nek anteyasa va uvoona num betasa va rieta ». Robert Jordan is Hemingway va pestaba is setikeks nekis enalbara va ruyat batlize walzilid : bad barda Robert Jordan va jontikote vor iku whisky iku krema fixar. Voxen tire, sedme Hemingway, ageltucafe ayikye gotir ulisik. Ostik, Robert Jordan is Hemingway va lanara doaca walzilid : gadikye kseyer, viltason ko taka kan viltaxa ke dilintafe gadye ; Robert Jordan krupter da batcoba tir nyukaca num merotixena afra sedme Hemingway. Wori belisik gruper da suterotik dere kseson xonuketer, viltason ko taka, ape nope vis zvak, i nope misapa laumasina gan forteyafa akola. Acum nyukuca vol dikir.

Robert Jordan tir divroidasik, ~ in grupeyer kane va beta za rodivroidar : va yona tisa vas bet lum ik ke beta teza. ~ Dirgayanon gan Golz jadiwik is divroidatason va lana za runi jadifa dilfura mal redjel, va gejelus blay ke Pablo al kozokever. Tode sopura titir kiewatca, pune torkevik va tupoas sayakik kal taneafa conya me rovanlizuketed. Ton « partizan » neyasik sopur, vey rossiavaf ravlem bazes va gejelusik levskus kadime redjel. Va vuidara djukutceder nume va batcoba anton trakur. Inafa neya tir sokasane ; volnik tir torkeva. In tir tec gaderopaf ukik. Kali kakevera va Maria, mecoba vamoe narayana lyumara tigir. Vuidara va kotcoba kaikfir, eke va gustuca vreparler, batdume in va tegi sye merotenvani rokotaskir. Tulon moi lana divroidara va impadimak, va mejera ke Kackin lyumas palik al tenuker. Palik al zo bakayar neken beka bakaks me tiyir awalkolaf, pune va yatera ke blay ke Jordan tuviayar : « In me djuzavzar kadimeon antaf numen aytayá. » Va xonuka tir brunaf, i va tela ke artan ok in, kotviele batcoba xuton gu to lyumara tir. Va Kackin al aytar ise va « xonukesira va otcesik » gu malyaca luxeon krupter, nume va Pablo djuprogaytar enide odiayana vuidara di zo tcedecker.

Ostik va tapega ke blira ke sovietaf okilikeem koe Espana grivanovar voxise va kota krandera kerektar. Tokdume ? Kiren : « En golanet da ovet, isen ant wontera va ovesa lanera sokrister. Wontera sotir volnafa gu tilbu. » Favera va « tilbu » ravlem gan Hemingway me tir vestaca : Robert Jordan tir kevbuivenaf gu kiewuca ke intafa lyumara milinde Domenico tucpastik ke lekefa Espana va lyumara va « volnik » ke kristeva laneyer, eke va ayuca ilbeder. Titi Tel taulesimbik va sorga berpot, Robert Jordan, dikis va yolt milaf gu kuksa ke ailkera va Yesus Kristos, tir ukik dum sayakaf tucpastik.

Gu doevik vols kevtorkevik va int me tentur. Wori va jadifa dirgara ke Golz sovietaf jadiwik malveger. Inafa rietavafa karuca va ekeme griiksantuse va ar lymasik djukakrandes getcar : « Koe krandera, lana tozuwesa zaxara tir, ~ in slemar. » In gruper da wetce « kerik » trabe doevik koe intafa patecta re zo estovar, batinde viele ko vo dimlapitir, pune trasira va tavesikafe une titir wavdafa. Revulon xabe : in gruper dume banlize tigir, isen ant batcoba tickir zolonafa : « Remi idulugal is muvugal mu wawikeem ke tamava al lyumal ». Gu bat delt loplekut da tir balievik : « Va zolonuca gu kevon rotartfisa coba me lotiyir ». Va kota tegira gu direfa solparsar ise trumar da meka va ara turestar. Batdume, godivroidatason va lana za, kota fa isu undera va bata elimafa vuidara zo kozanid. In va kotcoba al drunar, i va tawavo is tegisik is ilkuca ke Pablo gejelus okilik, kare bat tanaf mukot. Va inafa xonukera me djutrakur.

Wori kelda ke Robert Jordan va tela ke Maria gamdar, numen lan dilk koe soyutafa gloga ke sayakatucpastik fenkuwer. Mali taneafa disukera, Robert Jordan lanecker da battanya en tir inafa. Nouca ke trelapafa skedegara va Maria tir volon milbaxekafa gu jijacek : Robert Jordan va renara bad per-sanoy bartiv ugalar, i va renara artode is arlize co ugalayasa bad per-sanoya tanda : « Va Maria renapá maneke en pesté awalkes kotviele doon tigí ». Robert Jordan jiligackar da intafa blira ok tela ke yikya stekeon rovotenuwer ; batdume va kota vula tiskina od ina pojapar : kota disukera, kota pulvira, kota xuvara ke gelt ke Maria kev inafa nuba ton tanaca num tciamacapa zo pestaled kire rotir tid bocafa. Bata rabatera va bana vanstar : bata barda koe ventaxo ke Espana lodam varafa abdifa blira di vodad : « Va bagalara ke varafa blira ugalá vielu koe bata meftava tigí. Anselmo tir losavsaf nik. [...] Yoromaf Agustín tir berik neke va berye meviele dikiyí. Maria tir an renanik is dositya. » To nouca ke bata barda tir maneke Robert Jordan va intyon bocaf viel gu avplekura va pestaka is kontera mevieli grupeyena krupter.

Inafa rietavafamuca gan prilara dene Gaylord krinayafe voltaxe koe Madrid nobane gan sovietaf xutasik ixam al zo bupilkayar. Banlize Karkov felusik va Karaf Robert icde geltruca ke mukot ke Sovietafa Tanara koe Espana is lyumara ke grelteem dene sokasane runitayar. Renarupa do Maria va inafa artazukera tenuker : sayakatucpastik al vanpir dokotik. Viele tici berpot astirbon zo bakar ( idala al zo ralcer ) aze gan moblis neyiktum zo jovler, pune vofar da intafa xonukera va warzafa sugdala bam narir : awalkeson, in va koncoba drasur, i va dositya is yasa, i va coba mevieli mekruldesa mu int. Inafa wetara mea tir vestafa, voldum tela ke Kackin, ise tuzolonawer kire soye tupestawer. Tuke Maria is gejelusik ke Pablo, Robert Jordan va ayaf lum tere artfir voxen to inafa xonukera tir bocaf frilt ke batmana domadawera.

Dere rupel

Tel taulesimbik va sorga
Open book nae 02.svg
XANTO
Vergumvelt For Whom the Bell Tolls
Sutesik Ernest Hemingway
Ava Englava
Suterotinda Berpot
Evla 1940
betara teza
Bookshelf icon (red and blue).svg  Tuveli icde Suteroteem  Bookshelf icon (red and blue).svg
Moek ke espanavaf piskuks