Teza:Xadola/Nelkaf betakseem/02/2019

Kudjotya ke Brassempouy ( okon Kudjotya dem djim ) tir stogoyeks ke wulafa kudjama. Evlon gu Guazaf Lekeraporugal ( Gravette Sare, 22 000-29 000 AR tanda ), tir tan loguazaf geltrackaf kaatoeks va ayafa gexata ise ape tir tel losavsaf koafizayan.

Kosmara

Brassempouy tir widama ke Landes utca koe Franca. Toloyo serixo ixam jontikedje vestayano koe Franca moe bata dota tigid : Hyènes Lupaxa ( Lupaxa dem digdatol ) is Pape Arula ( Arula ke papik ).

Bana arula mali 1881 gan Pierre-Eudoxe Dubalen az Joseph de Laporterie az mali 1894 gan Édouard Piette zo vestayar. Savsafa evla ke taneafa joxara va taneon dika trumara va badeem ke debak diver. Soe, Édouard Piette va konaka bada yoftena gu guazafe Solutré Sare isu milgafe pimtayar, is va omavafa bada inton drageyena va yoltara gu ’« Éburnéen Sare » ( Wula Sare ) nope jontik wulaf stogoyeks. Koe to batyona bada, re pulana dene Gravette Sare, va konak stogoyeks ke ayikyafa kudja kayestayar. Kudjotya dem djim tir tana, mali 1894.

Édouard Piette va batyona kudjama gu sulemaf kaatoeks ke Madeleine Sare trasiyin koe Pirineos rodega kavanayar nume va rietovaf ugalay exoneyer, voxen bana gan Henri Breuil di zo kevkaliyir.