Wisteria Lodge waba (suterot)

**Wisteria Lodge waba**
	XANTO
	XANTO
Vergumvelt	The Adventure of Wisteria Lodge
Sutesik	Arthur Conan Doyle
Ava	Englava
Suterotinda	Berpotam
Evla	1908
betara	teza

Wisteria Lodge waba

Wisteria Lodge waba ( englavon The Adventure of Wisteria Lodge ) tir berpotam ke Arthur Conan Doyle taneon sanegayan bak 1908 koe Collier's Weekly virda koe Tanarasokeem az bak 1917 koe Inafa bocafa celyomura berpotamak.

Vildeks

Tozafa bula

John Scott Eccles tir gubef is viderevaf wideyik. Den Sherlock Holmes koe lipok ke 221B Baker vawila lanir, lize va lana dempa gazdon dilizeyesa pulvir. Viele bantan va lazava ke intafa tigira fu pebur, pune Gregson ke Scotland Yard ardial kogrupasik is Baynes kogrupasik ke Surrey County batultikeem va kraba ke Holmes artlanid kire va in kaaneyad. Va xonukera ke lan Aloysius Garcia dakted. Eccles deneon darevielon tigiyir nume tir dalaf tubizik. Acum toz pwader : weti konaka safta, va Garcia bal sielcek grustayan gan dof nik al kakever. Garcia linulayar dinapafa tove Eccles numazen toloye ayikye va sint kadimion digin wiyid. Tere Garcia va Eccles ta tiskira va vieltum dene int koe Wisteria Lodgewaba koe winka ganeyer.

Darevielon Eccles va Garcia denlapiyir inde sin al katiyid.. Vedgobesik va yona megilton vradafa sugda nediyir, az ware loote viele va lana twa bal estura kazawayar, kore Eccles va neki ke bata lulawera me ve grupeyer. Aze Eccles moni 23^-e bartiv senyayar voxaze gan Garcia zo funeyer, i gan Garcia fenkuyus va tuvel bak mielcek ba gazdon 1^-e bartiv kiren ina va mamlera fogildeyer. Ba divmodera direvielon, Eccles rabateyer da mona tiyir vlardafa : vedgobesik is kwikeem banlize mea tigiyid. In zo evodayar numaze va Holmes auzuyur. Voxe zo egaleyer viele gu xonukera ke Garcia bak mil mielcek mone intafa oga zo givayar. To divulaca : bartiv ke xonukera vas mon 1^-e bartiv zo inkeyer, i vas mil bartiv viele Garcia va tuvel ke Eccles roklon fenkuyur.

Maera

Baynes kogrupasik tuke pintotafa kogrupara koe Wisteria Lodge waba, va twa kazawayana gan Garcia bak estura al katrasir. Bata twa suteyena gan lantelya va manembik givayar da lana sugdava co di ziliyir numazen in banviele ko lana olkoba ke waba co golaniyir.

Male bat givatum, Holmes va bifatum maltrakur : Garcia va skura va lana gomilasa tegira moni tane bartiv ke mielcek do lan dofugik stakseyes va twa al azedeyer. Garcia va kiewaskaf korik rovrutatas tod jiz va dalintafa tigira koe waba olegayar. Bandume Garcia rotuxayar viele pu Eccles ruyeyer da bartiv tiyir vas tane : enwe ape tiyir miamiel. Garcia van bazeyeno xo ke twa azon mallaniyir voxe moe kelda zo adjubeyer. Ruzadesik va alto lizukon jovleyer. Kwik ke Garcia tiyid dofugik nume vofason va meabdiwina dilizera va sopura, di yateyed.

Azon Holmes lagotur : toka waba koe twa zo divrozar. Ke vexalama dem kasafa kolna, va tana dem tubizaf irubasik sedme kalira ke widik tere trasir. Bata waba gan lane Henderson weltikye is Lucas kwikye ise Burnet weltikya tisa gedisik zo kereler. Holmes trakur da Burnet weltikya tir askisik va twa isen toloye irubasikye va ina al adjubed oke stoled. Holmes guzekar da bak mielcek do Watson va waba kolanitir, voxen azed zo waljoar abdida sin rovoskud : detik playeyen gan Holmes kabdue waba, va toloye tubizikye mallakise van golda koe riniz is poason malstasa va gedisikya al wir. Mil detik va irem arton bam radimelakiyir. Larde gedisikya va int rojuyur ise va imapdimak vol djukurundanyar, pune va ina pomayar aze lajusolimpayar aze kal gida ke Holmes is Watson stayar.

Burnet W^-ya va pebureem pu Holmes is Watson bam dafur : yolt ke Henderson W^-ye enwe tir Don Murillo. Ino tir savsaf torkevik ke istefa Amerika, yoltkiraf gu « Jaktol ke San Pedro », divbliyin ko Engla do kwikye enwe yoltkirafe gu López. Larde Murillo koe vofa patecta va jontik kosik al askiyir, pune lana lospa va int tazukayar enide va ino di katrasiyir aze di jaxadayar. Radimida sleda ke Murillo zo katrasiyir, pune Burnet W^-ya tisa ke mila lospa va waba seguyur, seotatason va giva. Va twa pu Garcia ( tisa ar bewik ke lospa ) ten suteyer viel gan López zo onseyer. Murillo is López bam gorayad da va twa pu Garcia di deayad enide bantan ko waba di lakiyir numen va ina moo kelda dilfuyud. Aze va Burnet W^-ya il oga djumalstayad nume va uculera me di vanimpayad.

Givayanon gan Holmes, ardial va Murillo is López koaneyar, voxen toloy battan lajupotced. Arti tandacku, Watson koe fela kosmar da koe Madrid zo adjubeyed, ape gan ar bewik ke lospa dere ruldayasa vas Garcia is Burnet W^-ya.

To satcaca tir : koe bata arienta, Barnes kogrupayas lanibelcon gu Holmes va mila sleda dye lajuradimefiyir nume va Burnet W^-ya dere djuprotunuyayar. I Baynes va ar tubizik dace volmiv sopeyer enide Murillo is López co trakuyud da ardial va sin mea sledayar. Holmes gan bat vomuldineyen kogrupasik zo woeper.