Va coba pu gadye torleyet (suterot)
|
Va coba pu gadye torleyet ( englavon What We Did to Father voxis The Evolution Man ok How I Ate My Father ) tir opasordaf berpot suteyen gan Roy Lewis az sanegayan bak 1960. VildeksErnest pwadesik tir Pithecanthropus jotikye varon ugalase va sardafa blira titi Pleistova sarepe tcalase va toza ke Balemeugal, weti vuntda is vuntda. Do otapafa yasa ( gadikeem is berikeem is yon ziavik ) iste Afrika wale Kenya mefta is Kilimanjaro tculk is Ruwenzori fluvor. Vieleafa blira tir wavdafa kiren sin gomalestud ise tove wivgasik gogelbed : tove rupol ik ar govitol dem remgabesa kotca ik cuynafa dema. Va govitafa werdtoradunolapafa milkava golaited aze malestutuson koalieson va awalkoda pu turci ik ar awalkodatorik, va lodaxaf sulem gonaytad. Voxen tuke Edward gadye tise greltokilik, coba fu zo betad. Edward tir rilitik. Ton swava dure tegisa, dun under ise va tanoye rieta gir : warzura. To gan warzuca is warzaca zo dulaper, is gan coba towasitisa va grelt gu lokiewafa blisa gropa. Inafa jugemera : Pithecanthropus ayol va aala to gojovler ise goranyar ise va bali bene nuba gogir, mea levgatason va tuwavafa mwa wetce kosik. Va yasa al buivé da sin kaik aalbesaxo goblid aze va an yal firvir : va tey. Tic divlankes tculk kevaneyayar aze va in arte gama malbureyer numen banvielu teyap rune buta iptokedar, tuidulason va staba is ilplekuson va zugaf govitol. Kottan tir valeaf ok cugtan : Vanya ziavye me dotrakur. Vanya tir berikye ke Edward ise tir muik ke prostewa : « Benje tokdume co djublirarut ise va abdigadafa linulara co betat ?» Vanya va rilitafa swava ke berye grivanovapar ise etimar. Narayar da dive staba blir, savsaskon koe aala, ise kotviele va yasa auzur, pune dun karidar neke grifenteson drume tey va katecta impavantar. Inaf nyapay tir opelaf : « Back to the trees! » (« Ko dimon aal !!»). Manviele Edward is Vanya remi yon bartivap prilad : Edward va berye lasubuiver da bali ke ayol tir towara is lumisara va enja ke alto kan brubefa warzura. « Va myot somedit. Kas va konmana xa me roteput, i xa kareon rodiskina az ro deswana ?» Numazon Edward va vage gandur. Akricuotsa sotir rantafa nume kalion tuaxawer... Battode ben tey tuidulat numazen di tuolgawer numen tcabanera zo tukiewatar. Kota kosmara tiskana gan xuyava va abduxoa gozanir. Kotviele Vanya va batcoba gilder, pune epitumar ise exuker ise culimer da berye va tuwava vol djukoveger ; batmana envara va bli sedmeon tir rabarsafa. Numen zidesinon ko intaf aal dimon ticumar. Vieleafa blira ke staba ke Ernest saftasafton zo arur. Tuke tey, rupoltum div arulapa zo aloyar numazen yasa rundanyar : erod koe blira ka staba awir. Tuke tuolgayanu akricu, tcabanera tir lokiewafa ise staba mea aeler. Acum kottel toz trakur ise under numaze warzur. Trasinon gan merocuesin Edward, ilkuca ke Ernest is berikeem van amidafa nia towar. Oswald taneanazbeikye tir alizmonik is zugaf tcabanesik, edje William jotikye va divulafa bagalara va sulemafa tukwara lomegar : konviele va vakol yoltkiraf gu Felay lagrigovitar. Ba lan sielcek, Alexander klokesik va izga ke Vanya ziavye kev dzeta ke arula kan yeldki kawarzer. Ziavye zo perlegasir nume koridar da intafa izga zo dubier ; wori bat jotaf ayol va volasa yamba su gandur. Bam Ernest under : viele Alexander va kon melmakol zovdar, pune kas swava ke sulem gan bata ewava me zo stoler ? Kas me tir vuwik ke ban melmakol aytayan bal darefa tcabanera vox bak keniba is klok dimon co auzus ? Ison divulaf korik gamdayan gan Ian ziavye ilapon koyapayase kal Sinia, toktan tid ? Bantan yoltan gu Neandertal ayik gan Ian, va stabik moi awalkera gikotawad. Efe batcoba tir tinusera voxen bula ke batmana miga va warlaf Ernest undeson kobupar. Azon lanviele Edward va baroye taneanazbeikye il yasafa arula divstar enide sine va ayikye ke ara staba di yerumad. Tire Edward malyedar da fortey ke yona amidafa yasa en zo gonaotced. Baroye jotafe tcabanesikye va baroya dositikya gononaneyad aze di yerumad. Den yasafa arula xulton doon dimlanid. Ernest va Griselda yerumar aze va ribiegafa pestaka kosmar : va rena. Moi dimlanira, ayikye zo akoydad : Milicent gadya va lana kosmara al askir : va burmera. Banvielu atela zakon mea zo vumbeter, vols solzayanon ok fregayanon ok reliezayanon... Mana fariura ! To warzafa tabodjasa danda tove Vanya ziavye. Ayikye va lani raporki dem cugunaykafa kira dere vanbured : viele ini zo tazer, pune va yozdapa roteyasa va rodafa toa sonekir numen va tey seotav ! Va tculk nareteson mea goticlanitiv. Edward tir seramaf voxen lana danedira tenulejer : tey va aala is azeka koanteyar numen gulaf firdap va kotcoba gu arula anamvilar ; sin gonomallanid trasitison va warzafa luva. Staba jontikedje lanir aze arti abrotcifa tiskira va ribiegafo is wivgakirapafo aalxopo artlanir. Goxe ino ixam tir sokexo ke aryon ayol... To Edward va parlera vajuler numen lana finera zo zolter : mivirubik va lik ke tawavo xaadad. Bata disaca va koncoba preyutar : tire Edward va rokara va koirubara gu birga ke tey ikazilir ise va inafa warzafa kosmara dere djuprorazdar, i va kabuxa va ilafa tceka : va tra. Nazbeikye zo pad isen staba gan dusiva ke Edward me zo buiver, i gan dusiva ruyesa da ant walzilira va grupera di nover da Pithecanthropus ayol wan towatar. Edward al kaikfipir. Batdume moida tra zo tukramar, pune Ernest va Edward tcekar nume aytar. Gadye va bana tamava su denfir, i va tamava lize aytatyan melmakol is tarkan ambik somoblid. Aze Edward ba mil siel gan stabikeem fipton zo estur. Dene Pithecanthropus ayoleem, alto men zo kotawar. Dere rupel
|
| ||||||||||||||||
.svg){kind=icon}