An grot (suterot)

An grot

An grot tir berpot ke Émile Zola sanegayan bak 1886, i san-balemeafa karba ke Rougon-Macquart yasa nevatum.

Vildeks

Megrupenuca

Loleon koswavayana gan Paul Cézanne nik, Zola radimi sanegara va neva bak 1886 gu ine va int di seleyer. Va bwoy ke Rougon-Macquart yasa kan bata san-balemeafa karba daskiyir, i kan berpot kre ektudasa va yambik is tulon Claude Lantier lingesik. Bantan tir nazbeikye ke Auguste Lantier is Gervaise Macquart tis dalaf koredik ke Sagondexo berpot, is berikye ke Étienne tise seltevaf exusik ke Germinal. Tir rotapsanaf lingesik nume va poliafa blira dem jontika gedrafa kovewara yambafa ik yasafa ugalar. Koe Sagondexo berpot, lanviele savsafe weltikye va Claude anyustdafe ko Plassans solstayar kiren gan listuca ke inyon zovdaks al zo brostayar. Claude koe Jivot ke Paris berpot dere awir lize va Sandoz berpotik tunar. Dere tir ke bata warzafa yambikafa oxila wavdon lasuvanstasa va witafa is betawesa cora kev pulotuca ke sinafe sare. Voxe me di zo kagruper numen inaf grabomeem di zavzar rastaf is afanan. Dace nik ke Lantier va inafa yambafa godela me gildad. Tanoy korik di tir zolonafa gu inafa blira ; Christine, lansielon kakeveyene kabdue bedablo kir gelbeyene gu muva. Ant ine va in folir. Va inaf dotay dem trutca kerektayana gan kottan aze arti jontika kakevera isu prilara kene Seine bost djupromundar.

Lenopa

Trutca skuyuna bak bata mundasa fruga, dum kotara, di zo kerektar azen meem ke Christine fu tir gelbe ke Claude. Tolonga va tawaday koirubar, ile fogra ke widava, aneyatason va opelafa is aulafa blira. Va Jacques-Louis nazbeye di dikir. Claude va yambafa jugemera koton al jovler, ektudason va yasa. Claude is Christine va dimpira ko kelu gorad. Lingesa jugemera ke Claude gin tir voxazen rodjesa pestaka dere kalion koaykar numen Claude ilpokoleper. Inafa trutca tantanon gire zo vewad. Gorar da va grot ke blira fu skur, i va datafa trutca vas lum ke lenopa lingetena koe glesta apton lizukeduna. Jacques-Louis ba san-tolda mulufter numen inafa griawira va abica gluyaxa ware laptesa dene tolonga ten joar. Claude va Christine adre ilfir, ektudason va an grot vox dure apteson. Arte kotcoba don piksa, Claude poke intafa metenukeyena trutca kser. Neva nakilon gu breg tenuwer.

Koredik

Claude Lantier

Tir nazbeikye ke Gervaise Macquart is Auguste Lantier ise koe Plassans kobliyir. Aze ko Paris gan gadikeem zo malstayar. Ba anyustda gan lane guazikye karolayase va intyon zovdaks gire zo dimstayar. Claude dene reila remi perda vayar, vistalenon gan nendasik kali inafa awalkera. Bantel va turwi vas 1000 Franc talolk puon iskemar. Claude va batyona tanda do rumeugalaf nik tiskir, i do Pierre Sandoz is Louis Dubuche. Kadimi awalkera ke nendasik, va sin ko Paris kazokever lize va lingeropa di djublidar.

Tir figik mustaf is zidesaf, anton blison ta lingeropa. « Do rin me djumallaní, me djutí kalaf, djulingé. » ( 13-eaf luz ). Pedrane gan xantafa ludzotewera ke Adelaïde Fouque veygadya, Claude tir lingesik me lajuradekas va norluca. Enwe tiner kire ont va trutca ton remgudaks isker oke vaon dun ubzer, meviele tenukeson. Kali kunca kobar neke tir lingesik isketes va mek grot.

Yambon, den litevaf lizor galter. Koe bat berpot, Zola bata serna gu « gaelxoikeem » yoltar, nope « Gaelxo » trutca ke Claude atoeyena bak taneafa wonara. Bata trutca gan « Afizestura moe werd » ke Manet al zo koswavar. Dere litevik nope trutca ke Monet yoltkirafa gu « Lit, ticawaltara » batinde zo yoltayad. Bat lizor, dum tel litevaf, va cultimevafa yamba levliker. Voxen konolerokafa tittira ke Claude is inafa oviskuca nekina gan nera ke ana trutca, i ke an grot, jupad da ine arti berpot betawer : tore va ageltafa blira is ageltaf kseveem djulinger, aze tere ton intafa lebafa « Ayikya » trutcapa va lecevaf lingesik dakter.

Pierre Sandoz

Pierre Sandoz tir berpotik ke An grot suterot ; Zola va tec jontolik divedjapon askir viele in va intaf abdumimaks icde Rougon-Macquart nevatum slemar : « Va kona yasa fu narer, aze va kot bewik vayatá, lizu tid, liz fid, inde kategid, kottan ; tere va lan tupinan ayatum, inde ayikeem atrir ise linular... » ( 6-eaf luz ). Bato kro gu konak suteks ke Émile Zola koe tulon abduekrent dimstaksed. Vegedutuson va Sandoz koredik, Zola va konaka mivizvafa rupama walbur, tulon zilison va albara va burmotaropa ke Aix-en-Provence, is vistaleson va in koe xo lize int al blir, tulon keve Batignolles vawila.

Christine

Tir nazbeikya ke Hallegrain redakikye mulufteyese viele Christine anton tiyir san-toldafe, dovey parisikya irubasa koe Clermont is gaasa va nazbeya kan turwimi tukotrani kan lingera va ruelga. Bantelya va nazbeya gu eyikam gaar voxen Christine zo argar. Moi muluftera ke gadya, den xida zo koemuder lize san-alubdon di blir. Gadesikya ke xida va ine albar nume va runda wetce belisik ke Vanzade W-ya kulaf is riwe wiiskaf nyobrik koseotar.

Kalion Christine is Claude ve renad aze ko tawaday yated, i ko Bennecourt lize va mona lizukedud. Bak konak aksat albapason di blid voxazen Christine xuye ve nazber. Jacques-Louis nazbeye gan gadikeem dikeke zo viunsur ; Claude va in wetce golingen pintaf tezik torigir isen Christine me pester gadikyafe. Tir fertik vols gadik. Radimi dimpira ko Paris, muluftera ke nazbeye anton di tir yonta ta trutca ke Claude, i ta « Awalkaf Rumeik » trutca staksena den Wonara voxaz warolasa va meka kiewatca.

Christine va lingeropa ton lickafa bogara paskaler. Tis tezik ke « Lebikya » trutcapa gotitisa an grot ke kurenye, adre tulickawer : « Ine me rokleyer, pestaleckeyer da Claude va ksudaks lodam ine abdualbayar isen ban ksudaks zo sonteyer, tiyir tanaf abdikerelenik is krenugik ke kot bartiv. » ( 9-eaf luz ). « Christine va in gu lingera me lajusoltiolter, nekev areldafa tarlera viele abicedje nutir cenese. » ( 12-eaf luz ).

Louis Dubuche

Tir rumeugalaf nik ke Claude do Sandoz. Koe Plassans atrir aze va toloy nik ko Paris kazokever lize va Yambatcila bema wetce vegeduropik denfir. Tir loon pulotaf gu rieta, jontikviele va nik me dotrakur. Va nazbeikya ke Margaillan tuglastaweyes kulaf kijasik lajukurer. Voxen bantelya dun akoler ise tir axafa, anton nazbasa va toloy rabetaf nazbeik : Alice is Gaston. Askiyison da ikagadikye va erba jontikote drasuyur, Louis gu arienta zo divpakuder numaze ko La Richaudière waba gelber, lize gan kwikeem di zo vligur. Koe sutuca, tir mafelafe gadikye nendase va nazbeikeem is viunsupuse.

Dere rupel

  • Émile Zola : Francavaf francaf suterotik ( 1840-1902 )
  • (fr) An grot, dene Wikisource ( xantokrent )


An grot
XANTO
Vergumvelt L'Œuvre
Sutesik Émile Zola
Ava Francava
Suterotinda Berpot
Evla 1886
betara teza
  Tuveli icde Suteroteem 
Moek ke xantof piskuks ke 1886