Derka ke Mouret gertikye (suterot)

Derka ke Mouret gertikye

Derka ke Mouret gertikye tir berpot ke Émile Zola sanegayan bak 1875, i alubeafa karba ke Rougon-Macquart yasa nevatum.

Vildeks

Abdi kusto

Serge Mouret nazbeikye ke François Rougon is Marthe Mouret, i ke kottol awalkeyes koe Levrotira va Plassans karba, tir idjaf koredik berpot. Koe darefa neva, Mouret astirbon al akoleper. Faujas gertik va in viunsuyur, koplekuson va nelkot ke alkafa gaara is divmodason va kubla. Griakoleson, Serge va gadikye buiver da djukuvanpir gertik. Bantel daboreson tere naler.

Serge ba tol-san-alubda vanpir gertik. Koe Les Artauds tambafa widama koe govitafo ventaxo ke Provenca arte yone decitmetre male Plassans vofa widava djuprogertur. Do Désirée ixakafa berya anton skeusa va sulem ke wilxo, koirubar. Opelon blir, sonteson va Maria Ketikya. Lanviele Pascal Rougon ziavye ( titise koredik koe Pascal kurmikye bocafa karba ke bwoy ) va in auzur. Ko Paradou wafaf pilkot dem cuisafa is soporafa matela lakid liz kurmik va Jeanbernat susikye goroper.

Radimi fuda

Mouret va setikera va fudafo xo vider, i va teca Eden matela merovansana liz nekevon kadimion gin lakitir. Bak diref miel ve riftakoler. Radimi febafa ropera, Pascal kurmik ko Paradou stakser enide in remi vogonugal di zo viunsur. Banlize va Albine nazbeikya ke Jeanbernat susik grupenar. Ilgrupeson va gertaf sok, nope sumpa ke listikya zertur ise kempar, kosmason va puve batvieli meroculimene vox biune. Gan Archangias tucpastik zo onser nume inton dimromeyason di goblir, dimlakison ko uja ke Les Artauds.

Radimida zarduca va al bulumur, pune Serge va Yesus vanfir ise va Albine lasuvulkur... Bantel ware yawar voxe taneon zo beldar. Soe tere ko Paradou kevlakir. Matela tir dem kseva ke muvugal isen grupason da sinafa skedegara tir bexodiskafa, Albine va Serge aloyar, mewelidason da nope sinaf oc nazber. Kadimion mulufter, doon ilbureson va birga. To Mouret gertik va caxara di gader.

Ironokafu bu ke berpot va Serge linese nedir. Désirée berya va ine vanvulter, dakteson da jaftolya su malnazbar. Bli dure cenesi va roka dimmarir. Danedira ke Émile Zola tir meroruuna. Tuwavafa jugemera ke ayikye dimelagdane icde gertikye, va ilkadera va ayikya anton ronekir. Batcoba tir wafaf berpot leve awaltara ke Provenca caesa va lano kusto. Tel lojupekan pak ke Derka ke Mouret gertikye en tir ki viele Serge koe matela ke Paradou divmoder ; elimafa pimtara ke Zola va bat gemelt pilkovon turibiegad.

Dere rupel


Derka ke Mouret gertikye
XANTO
Vergumvelt La Faute de l'abbé Mouret
Sutesik Émile Zola
Ava Francava
Suterotinda Berpot
Evla 1875
betara teza
  Tuveli icde Suteroteem 
Moek ke piskuks ke 1883