Kontanya koe Berlin (suterot)

Kontanya koe Berlin


Kontanya koe Berlingermanavon Eine Frau in Berlin ) tir mivizvaf vrutaks ke jotafa germanikya ton pone mali 20-e ke balemeaksat kali 22-e ke teveaksat ke 1945. Va titfira ke Bareaf Gindugal is vangira va Berlin widava gan sovietafa ervolia munester. Battode sayakik ke bana ervolia va lonjera is pisonara don data gejafa boera remi konak aksat torled isen miltanya konakviele tir kosafa.

Bate pone bak 1954 koe Tanarasokeem taneatomon zo sanegar : pilkoma ke sutesikya bak 2003 zo basitalkar, trabe Marta Hillers.

Vrutaks

Krent va vieleafa blira ke berlinik don tulon ayikya bak imwugal ke 1945 kabdi tena ke Toleafa Tamavageja pimtar. Sanelia tir kesa ise gan moifa artlapira ke sovietaf milk zo polesir, isen irubasik koe kroguca ke germanaf skayatum miv kuzud larde Bareaf Gindugal fu duntur.[1] Irubasik tid jilaf gu zidepe blizesise va sovietaf milkeem kev int, nope tulon tolgenira va TSSS ke teveaksat ke 1941, is data gejagomilara ke nazi po wali 1941 is 1944 koe TSSS. Ostik gan ael is vuda zo flud ise gan kaaneyara va bliafa vugcoba varon zo tixad.

Moi germanafa duntura ba 08/05/1945, sovietafa kerelara kalion nijur setra tove ayikya kosafa gu ikrafa tizuca raplekuna gan sayakik ke sovietafa ervolia.[1] Uldinet da vuntoya ayikya koe antafa Berlin widava remi bana rekola zo boeyed.[2]

Wori, nekev relkuca, sutesik va vrutara ton lana becuca voner [3][4] : va meka bogara tove kerelesik muxar ise nekev mejera is plukera is waberga lajusoltrakur, karfamason.[3] Cuynon waldisukeson, va tsokuca ke vidjera ke milgugikeem va Adolf Hitler, voxis blikunacama is blikunacapa razdasa va ageltucafa tuwava ke kottan viele seltbolk zo romplekur. Pilkovon ba artlapira ke sayakik ko widava, in va destara divrozar da ayikya dene levfayikeem ke sovietafa ervolia tigid. Batcoba ke ayikyafa gropa koe TSSS tir divulafa tove in kiren ayikya koe Bareaf Gindugal vas kima ke 3K vierd wan tikiyir.

Dalaf koredik

Pwadesikya

Pwadesikya mebildesa va yolt ko nega tir yikya pimtasa va blira ko pone is vrutasa va tikisa bifa remi anyustoya safta : Berlin meld az titfira ke Bareaf Gindugal az kerelera va Germana gan sovietik. Wetce unenik ke piskusa tretca va int atoer ; bak jotugal koe Europa al koyapar ise va konaka ava don Rossiava is Francava felilecker. Va int ton « barsandafa latkikya dure diskisa va mila fentugalafa lioza ». Taneon irubasa koe jovleyena kraba, azon den lana nyobrikya gelber moida inafa oga al zo kidar. Ina nope ael az aorara mejedar aze koe kevaorafa luva vasker. Moi artlapira ke sovietaf milk nope cenera va Berlin meld, jontike sovietafe sayakikye va ina yonviele doboed, teka metan mu ina mei konara kosafa boenikya vezur. Acum tire, mayesina is plukena, inya va « konendara » ke fayapik ke kerelesa ervolia kaaneyar, i va fayikye ikron savese voxis novese va lana vansara va sinka.[5] Radimi dimdrera va sovietafa ervolia is mallapira ke sovietik div wideytafa revava ke Berlin, tir tana « rawaxoikya » godimvilasa va kelu.

Nyobrikya

I alubdikya igeltuyusa abdi geja, nyobrikya va pwadesikya kevemuder ise va intafa kraba do ina is Pauli W-ye lizukedambik walzilir. Dere boeyesa, vanyer luntafa tove pwadesikya ise va lana dofuguca doon voner. Abdikerelenon gu remblira dum kotar berlinik, tir muntafa gu sinka vanburena gan sovietik ise ladobulur viele bifa tuastirbawed. Xuvanon gan Pauli W-ye kadimi mallapira ke sovietik, erur da pwadesikya di grilizeblir ise va sinka dimnarina bas sayakik mea vanburer.[3]

Pauli W-ye

Lizukedambik ke nyobrikya, bate ayikye mal geja dimpir ise kalir da noglakoler. Pwadesikya trakur da batcoba tir gejafa waberga. Beka inye co gotir «nendasik » va toloya ayikya, pune tire va boera me tatcer.[6] Tise patopebik, va sovietik bal sinafa jonvielera paskaler aze erur da nyobrikya jupar da pwadesikya di mallanir vielu va sinka mea vanburer.

Petka

Petka tir tane taneafe sovietafe sayakikye boeyese va pwadesikya. Azon vaon toz kugdar, muxason maneke renar ise djuyerumar.[3] Radimida fayik koe kraba ke pwadesikya al rundanyad, pune toveon anton boger, dun ulirsir nume jontikviele relingar.

Anatoli

Anatoli tir sovietaf rikulik vey ukrainafa xanta, is taneaf fayik yaneyen gan pwadesikya ta tenutcera va jontika boera va ina. Pimtani ton ontinafe poikye « fakon levtiune » nek tizafe, wideyton tir vrodbarnik.

Mayor

Mayor ( rossiavon Майор ) tir weyustafe neciikye neke va pwadesikya djumilagir voxe me poar. Pwadesikye soe ikanaler kire va « nendara » wan olegar. Anatoli va tor is dzal pu irubasikeem ke kraba tiskar ise kali mallapira ke milk zavzagir.

Gerd

Gerd tir aguntanikye ke pwadesikya. Setikera va inye tir tani riafi neki tolpozilisi va pwadesikya. Wori, vielu kadimi mallapira ke sovietafa ervolia div wideytafa revava ke Berlin dimlapir, pune va vrutara ke pwadesikya is aryona ayikya va doboera beomar, dace duvuson va sina gu « mewerkafa vakolya ». Va widava bulur teka pwadesikya rogruper kase konviele di dimlapitir.

Ruena watsa

Boera bak kerelera va Germana

Toloya ayikya is baroy rumeik balieyen gan sovietafa ervolia. Sugda ke boera va toloya ayikya zo rowid.

Boera raplekuna gan sovietaf sayakik tid idjuum ke pone. Sutesikya va pirafa disukera icde bana rekola ke intafa blira bilder. Dumede ina is aryona ayikya va rotabdiwina gomilara ba abdulapira ke volnaf milk cubeyed, pune data ota is tizuca ke bat gomilareem di tiyid tolke kaike sinafa crakera. Pwadesikya va miv boera rion miwar voxe va tikisa linulara kre drunar. Inafa dizvera va sovietik zo nided : va lana suvera va yontan « torigis gu miltik » sedme trak ke August Bebel koe Die Frau und der Sozialismus ( Ayikya is Selteva ) muxar, voxise gan ruyatursus boesik zo boiker nume drigdapar. Va « Stalin kexi » biusi va mana lonjera pu sayakik dere miwar voxen bati kexi tire vol zo malaskir.

Uldinera va ota ke boereem raplekuyun koe Berlin wali balemeaksat 1945 [7] isu lerdeaksat tir vas vuntoya boera ; bata gunestera male teyera ke aptijureka remi yon diref aksat zo zabdur. Kunoya boenikya adjubenon ok kalbakanon xonuked oke djukuksed.

Koe varafa Germana, awalkera ke ayikya tikisa va boera vas tol-vunt-balem-kunoya zo uldiner.[8][9]

« Bata data doboera donon di zo moticar. Kottanya va artanya pulvison pomar, kalkalir, va katecta ta silukafa kalkalira is putcera va cila pu artanya zilir. [...] En, ketikyama adre tid riacapa. Va rekola is bartiv grupev viele ayikye va ayikya kotcabaned numen va ketikyama kobudev, ko jigay preyutav, ko musedaxo eruiltav. »

— Yoltiskikya, Kontanya koe Berlin

Rawaxoikya

Germanikya baspiesa va Jäger vawila.

Larde ayikya tiyid lokap ke wideytafa sanelia sokesa koe Berlin, pune ta baspiera va rawaks is gedrafa giskisa kobavera zo kucilodad. Pwadesikya belcon kobasa dene iaxe is sayakikafe tubatakaxe, is tisa kosafa gu waberga ke boera is melanuca icde stekeugal, va intaf vrutaks gu tan grabom ke Trümmerliteratur askir.

Bak 1945, 30 % ke Berlin widava zo rawayad [10] isen cuga kolna astirbon zo kidayad. Ota ke rawaxoikyeem malvegeduyus va germanafu kelu vas tev-kuna zo uldiner.[11]

Tuwidlara va ayikyeuca

Nope titfira ke koe seltafe dre is artlapira ke divef milk, blira koe Berlin gan elupkafo sayakafo po zo kofelir. Batcoba va yolkara ke bekseem icde ayikyeuca ke berlinik nekiyir.[3] Batinde pwadesikya va varafa megijarotiuca ke germanikye konedir, i ke ayikye co gonendase va ayikya kev boesik is nakesik.[3] Tana nelkafa keska drigdana gan sutesik tir kinokuca is zide ke bantanye atriyise do « preksa is katira » ke ayikyeuca voxnum kre takaskarase il debala enide sine va intafa blira di nendoyed.[3][6]

« Banugale, pu int dun katcalayá : jinafa pestalera betaweyer, i pestalera ke kottanya tove ayikye. Sine va cin saud, nutid tuaxayane is sutafe. To axafa ikra. Vanmiae ayikya, teca donafa awuzara leve welma cwar. Nazi tamava felina gan ayikye is tualiase va poikye yolkar, num doon vund va « Ayikye ». Bal savsafa geja, ayikye va gogol ke aytara ik xonukera yolton gu guga rodusiayar. Re, cinya va bat gogol walziliv. Nume gan batcoba zo artazukav ise zo tuvinjad. Tici bata geja, valey jontika cenera, to surtera ke ayikye wetce ikra dere titir. »

— Yoltiskikya, Kontanya koe Berlin

Kapestalera ke germanaf wideytik ba konarira va Berlin

Kontanya koe Berlin berpot va bliroti fosani gan berlinikeem danedir edje vedey al zo empar isen gaderopaf is arayaf ontinuk su griawid isen ironokaf ervokirik al zo gritixad.

Tire, dimfolira is loleon mivokafa jiligara kev nazi bolk dene sanelia tici geja fepoad. Sutesik gu puvotera va vertuma dace zo buntuyur viele inafa pilkoma zo razdayar.

Bat suteks dere tir wazdera va ginukuca ke nazi galbedura van germanafa sanelia, banugale torigisa va sovietik gu « rossiaf bonik »[5], solve krent va lanyon sayakik ton gruadik skeus va gaderopa ik lexa ik suteroteem dere dalinger, kore icde gejagomilara vrutar.

« Cinafa gazdafa is sielafa blikera re tir : « Va kota batcoba pu Führer danuv. » Bat blayak remi dilif tandatum keve lingeyen fintak ok koe dewitca va sisk is grewara muxayar. Re kore tazukoyera wan tir mila, pune pesta zo tukevolar nume va vligura is forguca re anton muxar. Folí da yolt ke batcoba tir ovasa tutrovgara. »

— Yoltiskikya, Kontanya koe Berlin

Emudera

Bate pone bak 1954 taneatomon zo sanegar, zo kalenglavar aze koe Tanarasokeem zo amuzer.[12] Azon koe Italia is Danmarka is Norga is Nederlanda is Espana is Nipona zo sanegar.[13] Emudera koe Germana bal taneafa awisira va xantaxa tiyir rotapafa.[2] Suteks zo kagar da « va poruca ke germanikya kifur », drigdason va « anawenafa volliduca ». Batdume sutesik va kota warzafa piskura kali awalkera di kalvewar.[14][12]

Tici 1980-e sanda ksudaks va krent koe germanafa kotla pridud ise va ayikyevafa undera koe Germana paked ; bat vrutaks va ayikyefa felira dene wideytaf is sayakaf selt eckindar.[15]

Bak oxam 2003, arti tolda radimi awalkera ke sutesik, warzafa piskura gan Eichborn tretca jupar da germanik koe vandiliweyesa patecta va batu bu ke intafa izva gin rokosmad. Bat piskuks abduekrentayan gan Hans Markus Enzensberger suterotik bam vanpir kiewatca taneon germanafa az tamavafa.[16] Suteks gan malyopasik zo taxar ; Antony Beevor britanaf izvopik gu « ana gijarotifa ilkafa nega ke Toleafa Tamavageja » duvur.[17] Kore krent nope mukoduca zo kiavar, pune gan lantan golde levefa tizuca ke lanyona ewa dile zo malyopar, tulon « vanmiae bat borereem kalkipé : ex mex, tí blis, me !? Kotcoba tere sovulkuwer !»[14]

Женщина в Берлине rossiaf kalkotavaks bak 2019 dene piskusa volruptesa tretca ke Belgorod nazbalar. Voxen arti tolda gan rossiaf malyerot koe varafa Rossia zo zuker.[18][19]

Pilkoma is gariuca

Marta Hillers

Marta Hillers bak 1935

Nope kiewatcapa ke warzafa piskura ke 2003, pilkoma ke sutesik gan Jens Bisky felusik ke Süddeutsche Zeitung fela zo razdar : to Marta Hillers tiyis germanaf felusik. Bata tusaneara va zidera ke Hans Magnus Enzensberger nekir, dakteson da « dace Bildzeitung fela va yolt ke boenikya djuzavzasa ayoltafa vol co basitalayar ».[20]

Sedme Jens Bisky, envara va suteks va iltrakura ronazbar larde taneafa europafa piskura blodon gu Kurt Wilhelm Marek zo remstayar, i gu Marek sutes ikayolton gu C- W- Ceram is tis nik ke pwadesikya is dadis va rokaki, is miv tis sutesik aptaf fu « kseara va mivizvafe pone ok suterotafa tutazukara va vrutaks ».[13] Ale uum tir grupera kase Marta Hillers tiyir ant sutesik va suteks dem 121 bu warzeyesu va sanegayan krent bak 1954. Eichborn germanaf piskusik va Kontanya koe Berlin va Walter Kempowski berpotik is ozodik vuidar. Bantan va meka turestara ke Marek va sutera va krent karavotar. Bak 2019 lan munesteks ke Zeitgeschichte kizey sanelayan gan Yuliya von Saal zolter da to Marta Hillers miv suteyer aze va tanuskafa straga ta sanegara tutazukayar [21], volto Marek inde Jens Bisky dakteyer. Marek va sutesik anton co yordayar. Sedme Yuliya von Saal, Kontanya koe Berlin gu « suterotafa tandewitca ton pone » zo gonarur.[21]

Jontiktan va gaderopafa liota ke Marta Hillers bal tulon nazi torkeva konakviele al nued. Jens Bisky kagar da inya tiyir « rojulasik va Bareaf Gindugal »;[13] lantan dum Clarissa Schnabel blirizvasik va sutesik drigdad da tiyir volke nazi pako ise va doevafo pako ke Germana bak jotugal sayudayar.[4] Wori Marta Hillers koe piskurind dene tulon nazi virda bak gejugal kobayar. Sedme Clarissa Schnabel, batcoba tiyir zalera va vertuma isen « ina tove nazi bolk meviele danuyur ».[4] Soe va krentki ke Kontanya koe Berlin ozwar : « Kas kevon tiyí ? Tire deneon en tigiyí, ise va anamef gael kagaelayá, i va gael laninde ksevackas va cin, kore me galpeyev ».

Vuestexa

  1. 1,0 et 1,1 (en) Janet Halley, Rape in Berlin: Reconsidering the Criminalisation of Rape in the International Law of Armed Conflict - A Reading A Woman in Berlin, Reading Rape, Melbourne Journal of International Law,‎ 2008
  2. 2,0 et 2,1 (fr) Hans Magnus Enzensberger, francaf piskuks. Gallimard, collection Témoignages, 2006
  3. 3,0 3,1 3,2 3,3 3,4 3,5 et 3,6 (en) Anja Wieden, Female experiences of rape and hunger in postwar german literature, 1945-1960, Chapel Hill, North Carolina University, coll. Electronic Theses and Dissertations, 2011, 221 bu, bu 22-87
  4. 4,0 4,1 et 4,2 (en) Clarissa Schnabel, Mehr als Anonyma : Marta Dietschy-Hillers und ihr Kreis, 2015, 448 bu, ISBN 978-3734788253.
  5. 5,0 et 5,1 (fr) Brigitte Salino, "Une femme à Berlin", un grand livre mis en scène, Le Monde fela,‎ 09/09/2010.
  6. 6,0 et 6,1 (en) Hsu-Ming Teo, The continuum of sexual violence in occupied Germany, 1945-49, Women's History Review, vol. 5, n°2,‎ 20/12/2006, bu 191-218, ISSN 0961-2025, e-ISSN 1747-583X.
  7. (fr) Patrick Saint-Paul, L'Allemagne secouée par un film sur les exactions soviétiques, Le Figaro fela,‎ 30/12/2008.
  8. (de) Helke Sander is Barbara Johr, BeFreier und Befreite, Fischer, Frankfurt 2005.
  9. (de) Seidler is Zayas, Kriegsverbrechen in Europa und im Nahen Osten im 20. Jahrhundert, Mittler, Hamburg Berlin Bonn, 2002.
  10. (de) Johannes Strempel, Berlin. Ende in Trümmern, GEO Epoche,‎ 2010, n°44
  11. (de) Leonie Treber, Mythos Trümmerfrau - Demontage einer Identifikationsfigur, SWR2,‎ 27/08/2015
  12. 12,0 et 12,1 (fr) Lorraine Rossignol, Seules dans Berlin, Le Monde fela,‎ 20/09/2008.
  13. 13,0 13,1 et 13,2 (de) Jens Bisky, Wenn Jungen Weltgeschichte spielen, haben Mädchen stumme Rollen / Wer war die Anonyma in Berlin? Frauen, Fakten und Fiktionen / Anmerkungen zu einem großen Bucherfolg dieses Sommers, Süddeutsche Zeitung fela,‎ 24 /09/2003.
  14. 14,0 et 14,1 (en) Luke Harding, Row over naming of rape author, The Guardian fela,‎ 05/10/2003.
  15. (de) Anonyma : Eine Frau in Berlin, dene Perlentaucher, 2003.
  16. (fr) Nathalie Versieux, Rouge cauchemar, Libération fela,‎ 13/02/2009.
  17. (en) Antony Beevor, Opinion : 'A Woman in Berlin', The New York Times fela,‎ 25/11/2005.
  18. (ru) Книгу "Женщина в Берлине" об изнасилованиях немок советскими солдатами внесли в России в список экстремистских, dene Настоящее время,‎ 23/11/2021.
  19. (ru) В России запретили книгу Марты Хиллерс "Женщина в Берлине", dene Colta.ru,‎ 23/11/2021.
  20. (fr) Odile Benyahia-Kouider, Enzensberger et l'anonyme dévoilée, Libération fela,‎ 09/10/2003.
  21. 21,0 et 21,1 (de) Yuliya von Saal, Anonyma: Eine Frau in Berlin. Geschichte eines Bestsellers, Vierteljahrshefte für Zeitgeschichte, n° 67,‎ 07/2019, bu 343-376.
Kontanya koe Berlin
Open book nae 02.svg
XANTO
Vergumvelt Eine Frau in Berlin
Sutesik Marta Hillers
Ava Germanava
Suterotinda Pone
Evla 1954
betara teza
Bookshelf icon (red and blue).svg  Tuveli icde Suteroteem  Bookshelf icon (red and blue).svg

Moi koilkara va Berlin gan sovietafa ervolia, nudasok bak pereaksat ke 1945