Mathias Sandorf (suterot)
|
Mathias Sandorf tir stuvaf berpot ke Jules Verne sanegayan bak 1885, tis tana karba ke Yona zultafa koyara nevatum. Bat berpot pu Alexandre Dumas radimiawalkon zo tarizar, i pu sutesik va Monte-Carlo biptik bak 1844. Toloy berpot tid dem dof uum beka tid amidapaf : koe Mathias Sandorf, magyaraf vedeyevik xonukalanzayan nope lana keluweyesa kevsokasa yovara, va osteraf flint kosongar aze tukulawer aze gu rankeyes relmesikeem jaxadar. VildeksYon taneaf luzTrieste, 1867 : toloy nistik, Zarcany is Zirone, va beksayana staksa bene koyaso dirbeko vumbeteno remazavzad, nume va skujera tunuyatasa va Magyara sol osterafa felira kosmad. Va Silas Toronthal krizaf omeltik suved numaze va vlepesik pu ardial ika gablera bilded. Mathias Sandorf kulaf biptik tis skujes okilik is Etienne Bathory is Ladislas Zathmar zo komalyed nume xonukalanzad. Taneaf ke sin tir nyobraf ise va jotapafa nazbeikya isker ; toleaf tir kurenaf ise va tanoye nazbeikye tise Pierre dikir ; bareaf va abidapase kwikye dikir. Lanzanik lagotced, favlason va kevedif laday, voxen Ladislas me lajupaskir. Sandorf is Bathory den Ferrato Corsica voik gelbed voxe gan Carpena zo ranked, i gan espanikye djugablene is djuyerumase va nazbeikya ke Ferrato. Banviele, ant Sandorf lajupotcer. Di remblir, pilkomaruson is tuke intaf fitc ke selaropik is wumodasik. Va lana sposuca is kulacapa urlicker nume vanpir pilkotik ke Anterkirtta ewalama grocelon ice refa Libia. Tokdume banvielu gu Antekirtt zo yoltar. WanaIlanacek al remfid. Moe etol ke molt ke Dubrovnik ( Ragusa ), nazbeikye ke Etienne Bathory va Pointe Pescade is Cap Matifou kakever, i va toloy merogriuzian francik maaktuson giopon lasuwas va estura. Yikye va nazbeikya ke Silas Toronthal savsaf omeltik renar. Voxe megruper da Toronthal tir blodaf gu xonukera ke intafe gadye. Goxe, Toronthal va nazbeya pu Sarcany al abdizilir. Malaskitison va gadikyefa kuranira, ina va kurera malnaler, piksesison va Pierre Bathory. Bantan gan Sarcany kevlik astirbon zo bakar. Antekirtt kurmik ( okon gu Sandorf ) va inafi bli giwar voxe jupar da kottan va xonukera ke Bathory di folir. Bantan vanpir dalaf pomasik va Sandorf. Levi kurera va Sarcany, Sava kosmar da me tir vey Toronthal tolonga nume va kurera malvewar. Miledje Sandorf va jaxadasa skura wan dakir. Pointe Pescade den blay ke Sarcany va int kan rolaf yolt koespar ; Sandorf va Zirone lagikser voxe tiner : Sandorf is nik gan mon alub-anoy tozekik koe Sicilia zo ivamudad. Pointe Pescade is Cap Matifou bak meld tructud. Zirone va Pointe Pescade astirbon bakar numen Cap Matifou gombalik tudagayan, va ine ko buga ke Etna tculk mimar. Sandorf va warzaf nik askir, i va nazbeikye ke Ferrato Corsica ewalik giwayase gu bopelawera. Ferrato jotikye va tiv drasur voxe vanpir ikaokilik ke Sandorf biptik. Bantan al kosmar da Carpena espanaf rankesik koe flint ke Ceuta zo stoleyer. Sandorf va gadesik ke flint fakon levtiur numaze va Carpena kigder aze koe tana intafa tota az moe Antekirtta ewala stoler. Azon va conyuta ke gadikya ke Pierre Bathory griawiyisa mali konak aksat katrasir. Ina nope megrupeni neki al tuoviskawer voxe kan wumodara gan Sandorf zo roper. Lana deksafa nakilara jupar da ina va ova katrasir. Ison fikunton xuye, koe ucom va twa pebusa va kotcoba wan dadir : Sava enwe tir nazbeikya ke Sandorf biptik. Voxe gan Sarcany zo guaptar. Sandof va vask trasir ; Pointe Pescade is Cap Matifou divstoleteson yazgad. Sarcany is savsaf Toronthal omeltik ko Monaco al yated lize erbombud. Sarcany gorar da va savsafa dofugik vanpiyis funes vrutasik fu aytar voxen bantan gan Pointe Pescade is Cap Matifou zo gralomer, batkane tatceson va zobara ke Sarcany. Bal bocaf fiuk, ewala ke Sandorf biptik gan ervokiraf milk tikif gu lan viray zo dilfur. Toloy francik bak doaliera tructud. Sarcany zo gralomer. Volnikeem ke Sandorf zo kostoler aze nope divroidara inton volins nekiyina xonuker. Koredik
YunkexaKonaka yunkexa va berpot, koe xantofa piskura, 1885 Dere rupel
Vuestexa
|
 Moek ke xantof piskuks ke 1885 | ||||||||||||||||
.svg){kind=icon}