Robur olgalicusik tir izvaf berpot ke Jules Verne sanegayan bak 1886, tis tana karba ke Yona zultafa koyara nevatum.
Uncle Prudent tir taneagadesik va Weldon kizey ke Philadelphia isen Phil Evans tir suteptik, voxen dere koekaf volnik. Weldon kizey tir boxo kabelcaso va dulapesikeem va vipkopa. Bat vipkopelik tid dagaf is volnapaf gu korik kevus va severo logamiafo dam gael gu vipka. Lanviele lan Robur den tana fruga ke Weldon kizey va int koaykar : va bewikeem tuyatkar kire ruyer da direkeugal titir ind ke talas foalk vols vipka. Wazdeteson va kaliks, va Prudent is Evans kilder aze gu Albatros totuk koplekur, i gu talas foalk bagaliaf gu Nautilus ke Nemo redakik. Robur anam tamava toz koyar, danedison pu sin da lan talas foalk lizin gan tral lodam vipka jontikeke zo rostujer. Koredik ke Robur gire titir koe Felisik va tamava berpot sanegayan bak 1904.
Koredik
Robur : ikayolton gu Robur olgalicusik, 40-dafe dritikye grupenon tise cosotiskafe dum gundapaf Nemo redakik ke Vuntoye decitmetre koe mid berpot. Tir gandusik va Albatros tota tisa severo gamiafo loon dam gael. Inafa altokafa pimtara vas poik ke tuwava vadjer.
Uncle Prudent : taneagadesikye va Weldon kizey. Tis ke amerikaf vedeyot, 45-daf. Tir kulapaf larde va loa tegila ke Niagara Falls sistu digir. Tir grolepes ise mu bagaf loon dam gael anton movogar ise va vegedura va Go a head vipkapa gader.
Phil Evans : suteptikye ke Weldon kizey tise 45-dafe dum Uncle Prudent. Va bantel ilkader malida gu taneagadesi fli zo divpakudeyer. Va sistu iasu va trula gader.
Frycollin : amerikafe ebeltikye tise 21-dafe. Zanisik va Uncle Prudent. Konejepes is delfajaf is vungaf is nyukaf.
Tom Turner : ikaokilikye ke Robur tise mon 45-dafe.
François Tapage : burmotasikye ke Albatros tota, francik.
Jem Cip : pofesikye va Weldon kizey.
William T- Forbes : bewikye ke Weldon kizey.
Dorothée Forbes W-ya : ikayolton gu Doll, nazbeikya ke William Forbes.
Martha Forbes W-ya : ikayolton gu Mat, nazbeikya ke William Forbes.
Truk Milnor : bewikye ke Weldon kizey.
Bat Fyn : bewikye ke Weldon kizey.
Harry W- Tinder : losposaf vipkopik ke Tanarasokeem. Va Go a head vipka volmiv vegedur.
Yunkexa
Konaka yunkexa va berpotam, koe xantofa piskura, 1886
.svg){kind=icon}