Va aluboya safta bene vipka (suterot)

**Va aluboya safta bene vipka**
	XANTO
	XANTO
Vergumvelt	Cinq Semaines en ballon
Sutesik	Jules Verne
Ava	Francava
Suterotinda	Berpot
Evla	1863
betara	teza

Va aluboya safta bene vipka

Va aluboya safta bene vipka tir stuvaf is izvaf berpot ke Jules Verne sanegayan bak 1863, tis taneafa karba ke Yona zultafa koyara nevatum.

Vildeks

Samuel Fergusson tir vestas grupeik. Do Joe zanisikye is Richard Kennedy naf ebaf tcabanesik, gorar da sin va ronefa Afrika mal Zanzibar kal klita ke Nil bost fu mootalad. Bata gola banugale tir men vestayana. Va vipka deena kum lavaga, yoltkirafa gu Victoria fu faved. Fergusson va lana foopula al gandur, i foopula jupasa da tie me zo ilnarir oken baltaxa zo kamimar ta stujera va ontine, numen vipka va mivvexackaf zalorap malnover. Mukot ke bata koyara tir kagluyara va gola vestayana gan Richard Francis Burton is John Speke koe ronefa Afrika is tela gan Heinrich Barth koe Saxara is aname Tchad uzda.

Toza ke koyara tir koe Zanzibar kene krimta ke India welfa, azen mootalara va Victoria uzda az Tchad uzda az Agadez az Tumbuktu az Djenné az Ségou kal Saint-Louis koe francafo boniaxo ke Senegala kene krimta ke Atlantika welfa.

Neva va jonkafa is iyelakirafa stuva ugalana gan baroy vipkik pimtar.

Watsa koe berpot

Vestara va megrupeno tawavo ba sare ke berpot. Jules Verne va grupeks ke sare icde tawavopa ke Afrika konedir.
Mikropafa vayara gan europik va afrikafa sanelia.
Dewitca icde zaava is mikra.
Yordarapa ke tukristevara ( kan koredik ke alkaf vuidanik ).
Riderotalara, ind lize Jules Verne abdudisuker. Koganera gu ridafa koyara yotcana gan askisik ke berpot ( abditrakusa va ridafa stuva ke Mal Tawava kal Tael berpot ).
Alpozafa wicapa ( dum zixa ke ticstira ke bwafa xeftoara ).
Kerektara ke Jules Verne va moava.
Malyopara va levetiruca ( kan divrozara va Zanzibar is inafo levetirikafo dolexopo ).
Malyopara va xonukagakera ( Fergusson torigis da xonukagakera rewana gan « govitik » tir loon udutafa vox nartafa lion dam rumkara koe intafo vo ).

Koredik

Samuel Fergusson kurmik
Tir britanik. Tir grupepaf gu tuwavaf opeem ise va kulapafa gesta. Tir koyasik is vestasik.
Joseph Wilson, dere opelon okon gu Joe
Tir zanon gu Samuel Fergusson kurmik, gruf is abidapas.
Richard « Dick » Kennedy
Tir budapaf tcabanesik. Va Samuel Fergusson gu inaf rulokaf azed al lasumeuiver.