Stuva ke Hatteras redakik (suterot)

**Stuva ke Hatteras redakik**
	XANTO
	XANTO
Vergumvelt	Les Aventures du capitaine Hatteras
Sutesik	Jules Verne
Ava	Francava
Suterotinda	Berpot
Evla	1864
betara	teza

Stuva ke Hatteras redakik

Stuva ke Hatteras redakik tir stuvaf is izvaf berpot ke Jules Verne sanegayan bak 1864, tis tana karba ke Yona zultafa koyara nevatum.

Vildeks

Vergumvelt ke taneafa pakava tir « Englik ko Lentenael » isen tel ke toleaf tir « Oprafo letaxo ». Acum grunpecket lize stuva ke Hatteras dilizer. John Hatteras redakik va tanoy klokara dikir : artlapira va Lentanael ta aliuca ke Engla. Goxe tove in, drig koo kelda va in jovler numen vanmiae nolda is opra is fent do abic sagik golyumar enide romoblir. Va Altamont amerikaf vestasik kakever nume va pak ke aliuca pu bantan is Amerika gokaxaar. Koe nubasuteks, Verne jupayar da Hatteras koe tculk xonukeyer, voxen Hetzel piskusik koe sanegayan berpot jupayar da tuoviskaweyeson di mobliyir.

Koredik

John Hatteras englikye

Milyoltaf koredik ke berpot, soe jontikviele kadimon zo stanjur. Va azilafa kuranuca dir, tir englaf is guon oklaf. Jules Verne va in koe 12^-eaf luz ke taneafa pakava atoer : « Ede me co tir englaf... pune co djutir englaf. » « Dis va somedimefisa adala is djuprovefas va bli ke artan lidam teli intafi. » Inaf nyapay tir mil ke tel Nelson rambik : « Engla zinular da kottan va goni raplekur. » Mukot ke Hatteras redakik tir da taneafa brinuga artlapitisa va Lentenael titir englafa. Batcoba tir danda ke jontika mijera va Altamont amerikik, i va bewik ke brinuga koe toleafa pakava ke berpot.

Nekev tianapafa adala, Hatteras redakik va ayafa pestalera grusatoler :

In me tir mevenkaf gu ayafa mejera.
Koe tenaf siatos ke berpot, va purafa muntuca satoler viele Altamont amerikaf kevlik va inafi bli giwar.

Koe taneaf nubasuteks, Verne askiyir da artlapison va Lentenael Hatteras xonukeyer, voxe ape turestanon gan Hetzel, va ara tena narar. Dace ton oviskuca kali bocaf blayak ke neva, Hatteras redakik gan Lentenael zo dustuler.

Altamont amerikikye, kevlik ke Hatteras redakik

Va amerikafa brinuga gadeyer. Tir antaf moblisik ke bata brinuga. Kosuxedayanon gan nolda, tici taneafa pakava gan Clawbonny selaropik is dositikeem nemon zo giwayar. Tir tan dalaf koredik ke toleafa pakava : vanpir bewik ke brinuga voxe gan Hatteras gu kevlik zo torigir kire tir amerikaf. Tition, Altamont redakik palser da tiyir bewik ke amerikafa brinuga van Lentenael. Mijera ke Hatteras va Altamont konakviele tid rumeafa, tulon : tode brinuga va empa ke amerikafa tota ta artlapira va Lentenael faver, pune Hatteras kivar da brinuga amerikon co zo torigir.

Shandon : tuzatkawes ikaredakik ke tota

Bat koredik titi taneafa pakava oxam tigir. Taneon tir redakik ke tota azen Hatteras vanpir numen Shandon zo titekavar. Va batcoba arkapar. Viele blis gropeem tuolgawerser isen Hatteras ta brinuga bak konak viel al mallanir, pune do lo drigik tarler azen sin ladimlanid. Tena ke berpot razdar da va malyafa estera al levgad : aelerseson va ayiktoruca gonoviduyud neke kotote di awalkeyed. Watsa vas ayiktoruca dene Jules Verne tir nobafa, ont icde taltekik pikseson ralentan gu ael koe plabafa anameda, ont wetce orpolk ke « govitafe sane ».

Clawbonny selaropikye

Clawbonny selaropik ( yolt beituyun gu tana nega ke Fenimore Cooper ) va milafa kolma do jontikar koredik ke Jules Verne atoer : tir ewaraf grupeik dikis va xadolafa araya. Tir xantaza ke jontika relandesa rupa.

Va yona kolma ke adala ke Clabownny koe grabomeem ke Jules Verne jontikviele trasit, i va tulon Aronnax tuwavopik ke Vuntoye decitmetre koe mid ok Paganel tawavopik ke Nazbeikeem ke Grant redakik. Tanbata kolma tir loriafa koe berpot ke Verne : Clawbonny va mijera ke Hatteras englik is Altamont amerikik lasutaruter, ise va prilara ladanter kotviele anteyarsas uum zo ruer.

Duk vakol, redakaf vakol

Duk vakol tir lotanuskaf koredik ke bat berpot ; tir tigis loon dam Hatteras redakik. Data tanuskafa rupama icde bat vakol va berpot yunked. Konak yunkes aluk ke Riou tikid : tana pilkovon koe 8^-eaf luz va klokasa corara kaatoer viele vakol va viaro ke tota gir. Clawbonny selaropik tir tel lokrenugaf tove in, voxen in taneon tir ensagaf gu Hatteras redakik az anton lospa.

Watsa ruena koe berpot

Vestara va megrupen siday is olgalicura va Lentenael tisa tanafe ne ke Hatteras redakik num tuoviskatasa ;
Oviskuca : durefa watsa ke Jules Verne, tigisa koe grabomeem is arti ware barda koe Lente nilt ;
Mikropafa vayara va Inuit lentexofe sane ;
Olgafa moblira koe lugavafa anameda : lyumara va fent is nolda is naelaf rupol ;
Ayiktoruca ke drigik ke Franklin brinuga geon yates, gruyeyena gan noeltaf vayaks va yupolk. Jules Verne va vrutaks kayestayan gan John Rae bas Inuit saneik krafiackayar beka ban vrutaks gan Charles Dickens zo akleyed.