Yermak Timofeyevitc

Yermak Timofeyevitc

1537-1585

Rossiaf kazakik is vestasik va Sibiria

Yermak Timofeyevitc ( 1537-1585 ) ~ Rossiaf vestasik va Sibiria bak toleafu acku ke 16-eafa decemda. Yermak Timofeyevitc ( rossiavon Ермак Тимофеевич ), kazakik ke Don gola tiyir tan taneaf vestasik va vataltefa Sibiria, azon noves va olgalicura va bana gola num kaikplatis va jowa ke Rossia mal Ural rodega kal Irtic kuksa. Xanta Afanasi Alemin veygadikye va Suzdal widava robiskon divvawayar aze koe aala ke vaticefo tawavo ke Volga bost gelbeyer aze vanpiyir drendik. Gadikye ke Timofey va mila ela uyur, aze tere Vasili milinde askir, vanikatcuson va Yermak yoltega. Bak 1570, sayakik ke Tsar gazik va lo dubiesik ke Volga tawavo deokad kiren sinafa guinera va skapa ke gola dasad. Gonotces, Yermak va gola ke Perm lentlanir lize va Stroganov yasa di kozanir. Bana yasa, vegeduyusa va tufa nope kazara va eip is myot, va telo logijarotifo kazafo gazaxo ke Rossia dirgar ise va Moskva gu eip is myot dye tiskar. Ivan IV va midura va ketafo ronefo tawavo is senura va kizexe is tcema is tadlera va ervolia ta ikanendara, mu Stroganov al rictayar. Bak 1572, mil Ivan drager da sin va yon kazakik nendatas kev faspara ke tatarik ke Sibiria seged. To orkon gu batcoba Yermak zo seger enide va nendara va ronefa jowa kimon ice Ural rodega di paker. Yermak ko Sibiria Olgalicura va Sibiria gan Yermak, trutca ke Vasili Surikov Bak 1575 Stroganov va novera ke Tsar gindik yaned enide va estesa brinuga ko taltefa Sibiria di staksed, ta djiara va tatarikafa dilfura. Ivan va gejara kev jadion ronef grelt is pilkovon Kutcum Cayban Xan gazik korictar. To Yermak kagrupeyes wetce takrelik is gorukik, va dirgara va brinuga gan Stroganov yasa mbi odiar. Bat in va koyara trumon grustar.Bak 1577 is 1580 va Kazak segeyen blay tutanar aze wetce tanaf is meaklen okilik tere zo kagruper. Ba 1-eaf ke lerdeaksat ke 1581, Yermak do 640 kazakik is 200 ar ayik odiayan gan Stroganov va Perm bulur. Sin tid ervokiraf gu lukari is dicima is abalt is nubema. To ervoliama tir, isen Yermak gan aluboy ataman redakik zo garveldar, i gan tozekaf fiuntik otceyes il malyerot ke Tsar gindik. Keno Kama kuksa is yona kovoa, Yermak is milk va Ural rodega kolapid. Va jowa ke taltefa Sibiria to mone Tura kuksa artlapid. Va taneafa tatarikafa dilfura drikon malplatid aze va fentugal koe Yepanca poke noeltafa Tyumen widava tiskid. Bak idulugal ke 1582, Yermak is kazakikeem va Tura az Tobol kuksa vatitlapid, azon bak muvugal va Sibir vangid. Kutcum gonotcer. Sibir tiyir kelu ke Xan gazaxo ke Sibiria, moe noeltafo xo ke Tobolsk, kovoon ice Tobol kuksa is Ob bost is Irtic kuksa. Banlize va fentugal tiskid. Konak golaf grelt, don Ostyak, va dodera va culiek pu Yermak lodam Xan gazik abdualbad. Fentugal tir olgaf tove kazakikaf milk isen tatarikafa dilfura loloon linved. Yermak erutuson va pomara, va Ivan Koltso redakik talton stakser. Koe Perm, Stroganov abdualbar da ino ko Moskva di lapir. Banlize gan gindik zo kazawar. Bantan taneon etrakas gan kulaca dimstakseyena mal Sibiria zo gevapar. Dirgar da Koltso ko Sibir gire lapir, abdizilison va pomara is tcicera. Yermak va yon milk ke Kutcum tere lajumalplatir. Bak idulugal ke 1583 va warzafa brinuga keno Irtic kuksa grustar enide va aryon grelt di gruider. Keno Ob bost dere abdulappir. Tici tanda, divatce ke inafa felira tir vas 400 km- lente Sibir. Xonukera ke Yermak Gretcaks va Yermak dirgas, XIX-eafa decemda Bak imwugal ke 1584, jadifa madakevera ke sibiriaf grelteem lizukonar, i madakevera stana gan okilik yoltkiraf gu Karatca. Ivan Koltso is 40 kazakik zo koskayad nume zo laridagabed. Karatca gan Yermak tere zo cener, voxe guaulatason va gola, va anton san-aluboy ayik bam wan dadir. Bak anyusteaksat ke 1585, Kutcum djujaxadas va darefa surtera, volmiv divgoler da teremta ke Buxara va Irtic su artlakir. Tana vuida ke Yermak dye tir nendara va kazafa joya ke Sibiria, numen in va 50 kazakik doon malstar aze fuzodeteson va dolekik, va kuksa vaticlapir. Voxen kevlapison va metan, djukuker nume va pemaxo koe ewala ke Irtic volmiv vegedur. Kutcum is yon sayakik impavantad nume ivamudad aze dilfud. Yermak rempujeson va kuksa lagotcer voxe wizuwer. Kutcum va Sibir kadimion dimon lajuvangir, vox vanion. Bak 1586 to sayakik ke Tsar gindik va Sibiria kolanid aze va gola toz olgalicud. Bak mila tanda va Tyumen redud, aze bak direfa tanda va Sibir vanpis Tobolsk gire olgalicud. Kutcum gire gonotcer. To tena ke Xan gazaxo ke Sibiria tir. Sedme rossiikeem, Yermak vanpiyir vunda, i leca ke warzafi taltefi roti tove sibiriikeem. Tir vestasik is olgalicusik fenkuyus va joya van roneka.

Yermak Timofeyevitc  Koblira  1537,  ( Rossia )  Awalkera  06/08/1585,  Sibiria ( Rossia )  Vedeyot  Rossia    Eba  Kazakik is vestasik va Sibiria   Vestaxo  Sibiria, Tobolsk   Tuveli icde Izvopa  Irowa ke Yermak bak olgalicura