Vladimir Arsenyev

Vladimir Arsenyev

1872-1930

Rossiaf tawovopik is suterotik

Rossiaf vestasik is suterotik, Vladimir Klavdiyevitc Arsenyev ( rossiavon Владимир Клавдиевич Арсеньев ) ba 29/08/1872 koe Sankt Peterburg koblir. Tawovopaf fayik ke gindafa rossiafa ervolia, va liwotara is mikrara va Primorye gola sure xaadayana gan Sinia pu Rossia gan gindik bak 1902 mbi vuidar. Va mon tol-sanoya ara brinuga bak baroya direfa sanda di skur, munesteteson koe coyunta ware grupensena ke rossiafa sumefa roneka. Abduaneyara malskuyuna remi batyona brinuga, jontikviele yunkeyena gu afigasuteks, va tawavopa is blira ke patectolaf sanelieem is dere ruxeem is dunoleem tulon tikid. Wali 1918 is 1921, bak wideytafa geja, tir ramisavik ke sedielafe Sokasane ke Sumefa Roneka ta mikraf lekeem. Nope konaka laxa koe Nipona is tanoya brinuga do Toriorusa niponaf vestasik teni 1920-e sanda, Vladimir Arsenyev va toidera joke volnik gan stalinafa vertuma mbi kagar. Gu xonukera zo lanzar ise inafa yasa di zo onkar. Vladimir Arsenyev koe Vladivostok ba 30/09/1930 mulufter. Inafa mona koe bata widava al vanpir tcila. Dersu Uzala Vladimir Arseniev is Dersu Uzala, afigasuteks ke 1906 Inaf losposaf suterot, Дерсу Узала, tir barneva ton baroya karba : По Уссурийскому Краю (1921) – Rem Ussuri gola Дерсу Узала Из воспоминаний о путешествиях по Уссурийскому краю в 1907 г. Владивосток (1923) – Dersu Uzala В горах Сихотэ-Алиня (1937) – Koe Sixote-Alin rodega Va inyona brinuga wali 1902 is 1907 koe Taiga aala ke lentefa Asia is kene Nipona Bira lente Vladivostok munester. Voxen ageltafa watsa ke neva tickir kakevera do Dersu Uzala ( 1849-1908 ) guazaf swavevaf tcabanesik ke Nanay grelt tis inaf nyapesik. Doon, Arsenyev va fent is ael is wupe ke Taiga aala liker, voxe va wafuca ke tuwava kan kota exaksara ke govitafi bli dere kosmar. Loon dam opelafa stuvaneva, Dersu Uzala suterot en tir kotlorevaf drom mu tuwava is ayik, nope armor is viafa tamefa siona, i drom kotraf gu rigotafa blira ke taneakafa tuwava. Dersu Uzala gan Akira Kurosawa bak 1975 katcalon elpaton di zo zaler. Suterot Дерсу Узала – Dersu Uzala По Уссурийскому Краю (1921) – Rem Ussuri gola Дерсу Узала Из воспоминаний о путешествиях по Уссурийскому краю в 1907 г. Владивосток (1923) – Dersu Uzala В горах Сихотэ-Алиня (1937) – Koe Sixote-Alin rodega Китайцы в Уссурийском крае (1914) – Siniikeem ke Ussuri winka В кратере вулкана (1925) – Koe buga ke tculk Дорогой хищник : охота на соболя в Уссурийском крае (1925) – Лесные люди — удэхейцы (1926) – Aalaf sanelieem Тихоокеанский морж (1927) – Lempol ke Pacifika welfa Сквозь тайгу (1930) – Koo Taiga aala Мифы, легенды, предания и сказки народов Дальнего Востока (1937) – Yona vunda isu prostewa isu kuda ke sane ke rossiafa Sumefa Roneka Быт и характер народностей Уссурийского края – Blirinda is tuwava ke coseem ke Ussuri winka Встречи в тайге – Kakevera koe aala Gedraca Dersu Uzala : elpat ke 1975 gan Akira Kurosawa

Vladimir Arsenyev  Koblira  29/08/1872,  Sankt Peterburg, Rossia  Awalkera  04/09/1930,  Vladivostok, Rossia  Vedeyot Rossia  Eba Tawovopik   Grabom  Dersu Uzala По Уссурийскому Краю (1921) Дерсу Узала Из воспоминаний о путешествиях по Уссурийскому краю в 1907 г. Владивосток (1923) В горах Сихотэ-Алиня (1937)   Tuveli icde Suteroteem    Tuveli icde Izvopa