Argishtikhinili ( urartuavon ar-gi-iš-ti-ḫi-ni-li ; armenavon Արգիշտիխինիլի ) tiyir widava ke Urartu savsafo gazaxo inkeyena bal divlizera ke Urartu vane Kavkaza bak gazugal ke Argishti I. Widava poron gu ini zo yoltayar. Widava wali -VIII-eafa decemda AGJ isu -VI-eafa di lapteyer. Rawaxo ke ralma ke Argishtikhinili getalte Armavir widava koe Armena arte 15 km- zo rowir. Widava kentalte Aras kuksa tore zo zabduyur. Darpe decemdeem, voak art konake decitmetre geon arplekuweyer. [1]

Izvopa

Izvopa va Argisthtikhinili va savsaf Armavir tikipir, i va tanu kelu ke Armena. Movses Khorenatsi koe intafa Izva ke Armena suteyer da Armavir gan Aramais veynazbeikye ke Hayk vundaf xantumik ke armenikeem [2][3] zo zabduyur. Inde rawopafa joxara ke XX-eafa decemda nedid, savsaf Armavir mali -IV-eafa decemda AGJ tice Argisthikhinili kesi tigiyir. [4] Bak 1830-e sanda Marie-Frédéric Dubois de Montpéreux swizaf koyasik al tiaveyer da lan tawarn poke Nor Armavir wida co rotir savsafa ralma ke Armavir. Mali kosmara va yon vapey dem simbakoraf kosuteks co rotis evlon gu sare ke Argishti I is Rusa III, dulapera va bat debak laumayar. Bak 1880 joxara va kesi zo bokayad, gadena gan rossiaf rawopik. [5]

Bak 1896 M- V- Nikolski rossiaf rawopik maltrakuyur da losavsafa widava ke Urartu sare leve rawaxo ke Armavir tigiyir. [6] Batcoba gan direfa joxara zo gruyeyer.

Yoke Taneafa Tamavageja is Armenafa Saneaytara, bolkafa joxara gadena gan Nikolay Marr koe Armavir bak oxam 1927 zo bokayad. Wali 1944 is 1970 Boris Piotrovski is Georgi Milikicvili is Igor Dyakonov koe Argishtikhinili moaneyayad. Sinafa remsutera va urartuavaf krent va vangrupera va jadion Urartu is pilkovon Argishtikhinili webepeyed. Ara joxara va kesi wali 1962 is 1971 gan Armenaf Rawopaf Kizey zo skuyud.

Zabdura

Urartuavaf valdig bazed da Argisthtikhinili bak -776 AGJ gan Argishti I bal inafa santaneafa gazasa tanda zo zabduyur. Abrotcifa divlizera ke Urartu koe vomekavkazafa gola is bodafa azeka tite Ararat mefta abdi exonera va widava tiskiyir. Moni taneafa gazasa tanda, Argishti va Ararat azeka is gola ke Akhurian kuksa is Sevan uzda toz zierdayar. Ba -782 AGJ va Erebuni ralma moe debak ke ref Yerevan wetce omava ke sayakafa sopura zabduyur.

Divlizera koe azeka ke Ararat gan likerama va Assur gejik geroneon jowon ice Urartu zo nonumuyur. Voxen bak gazugal ke Argishti gijarotiuca ke gazaxo tiyir mirastifa numen volnafa ervolia zo ceneyed. Arti balemdafa geja Argishti va azeka aname Ararat mefta lajukereleyer azen iste krant va widava zabduyur. Inafa erava co nutiyir dadira va ralma koe kota alava ke Ararat azeka. [1]

Sedme rawopik, Argishkhinili ape tiyir ristulaxo lodam sayakafa omava kiren inafa debala tiyir sayakon kiewansafa. [4] Argishti va Metsamor yantanyofaxo dere deliayar. [7]

Sedme ugalda ke Argishti I, Argishtikhinili koe Azzi-Hayasa gola zo kolnayar, isen rawopafa joxara al nedid da kot xim ke Iyekotugal gu -3000 ik -1000 AGJ al zo evlad. [8] Mek valdig vuestes va tawuk ke Urartu kev Azzi kruder, numen maltrakut da arti konaka gejusa tanda koe Ararat azeka, irubasikeem ke Azzi patecta abdi kerelera ke Urartu va intafa widava rotir al jovleyer.

Kosuteks icde zabdura va Argishtikhinili

Argishti I nazbeikye ke Menua pulvir : « Va ilamkafa ralma al vegedú ise gu Argishtikhinili intaf yolt al yoltá. Vema tiyir letafa, mecoba vegeduyuna kruldeyer. Vaxe kuksa va balemoy narilt al vegedú ; voraxo is iltaalxo al zo nyosad. Va batyoni tegi batlize al sopú... Argishti, nazbeikye ke Menua, gijarotif gazik, an gazik, gazik ke Biainili, nafalik ke Tushpa ». [9][10]

Kan gijuca ke Haldi lorik, Argishti nazbeikye ke Menua, va bat narilt al vegeduyú. Vema tiyir letafa, metan batlize irubayar. Tuke Haldi Argishti va bat narilt al vegeduyú. Argishti, nazbeikye ke Menua, gijarotif gazik, an gazik, gazik ke Biainili, nafalik ke Tushpa. [10]

Pimtara

Argishtikhinili widava va rontagentim vas mon 5 x 2 km- kereleyer. Wale ronef canak ke Nor Armavir is istak ke Armavir widava. Zegodaf raporaf folkay kene taltef is ronef krilt ke rontagentim tigiyid. Taltefa jowa moe abrotcaf xed solve ronefa eliwa moe burgif kaikiak tigiyir. [1] Andus narilt vegeduyun gan Argishti I vakene lodabrotcaf kril ke rontagentim tigiyid. Konake xe ke widava tcaston moe lizukafi kesi zo trasiyid. Varaf welmot tiyir vas mon 1000 iray. Varafe abrotce ke gort dem andus narilt tiyir vas loon 40 km-. Argishtikhinili ape tiyir tela lozolonafa widava ke Urartu koe refo armenafo tawavo. [11]

Xe ke Argishtikhinili vas berma is dopewa is vreda ruldad ise kaiki ugal ke Urartu wan zo faveyed. [1] Gort dem andus narilt vegeduyun wale Aras kuksa is Kasax kovoa tir milsaref gu widava isen konakbat narilt rekeon wan zo rowid (2016). [7] Sinafa vegedura va suxara va tawa vas 160 000 m³ tuadrayar solve folkayeem va burgi vas loon 40 000 m³ malsaveyer. Rawopik tradud da daginik wetce poan kobasik ta vegedura va narilt is ralma zo faveyed. [4]

Debala ke Argishtikhinili
Rawopafa brinuga ko Nor-Armavir. [4]
Otuk:

1. Taltef folkay ( moe kesi tigisi koe Nor-Armavir )
2. Ronef folkay ( moe kesi koe Armavir )
3. Koefa widava
4. Divefa widava
5. Vanpokefa kima ke miduxo ke Argishtikhinili.
6. Andus narilt
7. Kima ke guazaf Armavir, vegeduyun moe rawaks ke Argishtikhinili, moni 200 tanda kaiki intafa titfira

Widava ape tiyir lozolonafa ta ristulafa is skapafa ristura va Ararat azeka. Tire tiyir ristulafu is arayafu kelu ke valentexo ke Urartu. [12] Ristusik ke Argishtikhinili va vegedura va andus narilt stujeyed ise va walmunera va skapafa kiewega koe gola vertotayad. Darkapa ta belcetara va vor is zaipa is flibikafa ik sayakikafa vreda vawale folkayeem tigiyid.

Radimi Argisthti I, Sarduri II nazbeik koe Argisthikhinili dere tegipiyir, vegedutuson va atayexo is tugijapason va folkay.

Folkay

Voldum jontikara widava ke Urartu, Argishtikhinili me tiyir tigisa moe arna numen inafa sayakafa voda tiyir axafa. Kesimi lize widava zo vegeduyur, va trumindakirafa ralma dum Tushpa is Erebuni is Rusahinili is Teishebani me noveyed. Soe ta nendara gu megrustana ruzadera, pulotafa rebavega ke teza ke Urartu kene anamefi kesi zo kolnayar. Bata rebava tiyid kum diblafa norka moe cofuot kum delafa burgifa elega. Lentor ke rebava gu sekol zo tuprantayar isen zegodaf rasek alavon ice ralma tigiyid.

Stabrega ke burgif cofuot ke ralma ke Argishtikhinili
Radimi rawopafa kobavera ke 1970, dimtazukayana rebava

Taltef folkay lokiewon joxayan moe aluboyi kesi ke Ventaxo ke David tigid. Kolanixo arte tawastirk lenteon tigiyir. Tadle ke ralma tiyir dem baroya belca. Kota belca vas yona olkobama aname istef kusk ruldayar. Yoke nilafa kagluyasa kelda, lizira wal belceem ape zo vertotayad solve koe kota belca lizira tiyid nuyafa.[13][14]

Tawamidura

Koe bodafa tawa ke azeka ke Ararat, dent is aryona zaipa zo miduyud. Voraxo is belvetara tiyid zolonafa tegira. Rawopik uldined da olkxo koe Argishtikhinili va warzeks vas icle 5000 decitor rotabdaraykayad edje zaipamidura bristuna gan soka va welma vas mon 5000 decemiray ektuyur. Vorfuk ke widava vas mon 160 000 inoc dogiskiyid, kle askoason va unera va voraxo vas mon 1250 decemiray. Ostik jontik wideyik va intafi tawayki. [4] Bonolaf xim ke tulon ciastoa dere videweyed. [15]

Yambudafa tegira

Jontiko nyofaxo va rapor ik kuritca koe Argishtikhinili al zo trasid, nelkon ta midusa yazgara, ta jadifa ik aptafa unera dum raporafe cade is konaki amidafi glefasiki va olk. Kuritcaf trig ta belcetara va amidaf warzeks dum regelta ok vor zo faveyed, i va warzeks belon kazan do vegungafa patecta. Belcetara va vor va granaf ak pakon kougayan gu sid tuadrayar.

Yantafa nyofara koe Argishtikhinili zo vonewepeyer. Jontika azilxa isu iyekotxa al zo kosmad : midu is imizxa is pertor is roga ikz-. Rawopik va raporafi ik trocadayafi glefasiki ta aynara dere al kosmad.

Ebavaf gor koe Argishtikhinili
Mikropatcila ke Armena, Armavir

Vamoeon : raporafa krafolma ta glefara va denta gu regelta. Talteon, nubafa xeka ( karase ) do yezvarak ; roneon, mila xeka ton rabaf siatos.

Roneon : rumela kosmayana koe fukam koe Argishtikhinili. Rumela koe sid vas 3/4 ke ontine tigiyid. Kotawayan pak ke rumela loon dam berga divaykayana koe rid al lapted.

Miduraf trig tid ke amidaf ord isu lum, dem adeenafa ok malimpanafa vuta is fum dum lima. [16]

Ekotafa galema dem trelafo bergo is abrotcafa vuta is kuritcafi drewasiki is bludafa sarma is abday ton amidaf tazuk al zo trasid. Abday tiyid zikenaf gu monalentor ik darkasaberopafa teza ik toakoraf glarpuks. [16]

Ke aryona muka, va gum is bilaga is anoz is bregafa fiumta is selaropafa sarma dem sarmuk trasit. Alkaf fiptaf ak yunkeyen gu bargentim ik conya ik beetc ik zveritakakorafa ok munestikokorafa ewava koe Argishtikhinili al zo trasid. [16]

Bak vantenura ke Urartu

Nope surtera va Sarduri II gazik, titaytcura ke Urartu gazik tenuweyer. Rusa I diref gazik va po ke Assur dere me rokevgiyir ise moi eaftafa surtera gan ervolia ke Sargon II kser. Bal tolgenira va Urartu bak -714 AGJ, Sargon II va alka ke Urartu dendapayar, vilason va tumtaxo ke Haldi jadif lorik koe Musasir. Noafa vegedura adalayasa ke yon daref gazik ke Urartu tuviaweyer, voxe koe ant gola vabdue Kavkaza zo wanuyur. Kosuteks ke gazugal ke Rusa II nazbeikye ke Argishti II ( gazayas wali -680 – -639 AGJ ) az Rusa III nazbeikye ke Erimena ( -605 – -590 AGJ ) koe Argishtikhinili zo trasiyid. Ladimplekuson va aliuca ke atayera va Haldi, milafa dopewa koe Argishtikhinili is Erebuni is Teishebani zo kolnayad, dem milaf yunkes kosuteks ilempas va lorikeem ke Urartu vox dere kodoplekus va Marduk lorik ke Babilim :

Koe warzafa dopewa, va tanoya deaxolya wetatana pu Haldi lorik is jaftolye wetatane pu Teisheba lorik is tanoye namulolye pu Shivini lorik is tanoya jaftolya pu Arubani lorik, is tanoye namulolye pu pertor ke Haldi lorik is tanoye namulolye pu Iuarsha lorik iskeyé... Va batcoba kotote askiyí. Rusa nazbeikye ke Argishti kalí : ede bettan va bat atcom vilar, bettan decenar, bettan dubier, bettan ko sid kotawar, ..., bettan etimar « va batyon grabom to skú » ise va jinaf yolt gu intaf ikaplekur, pune gan Haldi lorik iku Teisheba iku Shivini iku Marduk zo vilatar. Inaf yolt isu yasa moe tamava me krulded !! [17]

Gazon gu Rusa II, dulapera icde Teishebani ralma manton zo plekuyur. Jwa ke aryona widava don Argishtikhinili koon zo arbureyed. [18]

Stogoyeks ke urartuavaf simbakoraf kosuteks ke Rusa III male olkxe koe Argishtikhinili

Rusa II va vantenura ke Urartu lasuwaljoayar voxe xodjeyer. Warzafe olkxe, miwane koe kosuteks ke Rusa III gazik, ape tiyir tele zolonafe xe kolnayane koe Argishtikhinili. [7] Kadimion wideytafa is sayakafa sanelia va ralma ke Erebuni pendaropon nubuluyud, i va ralma banugale tisa zolonafo sayakaxo ke Ararat azeka, ise va nelkafo po ko Teishebani ralmapa kazokeveyed nume va Argishtikhinili keunisiyid. [4] Moni -600 AGJ bata widava zo gralomeyer aze zo firdeyer. Rawopik va xim ke ruzadeso ervo is conyuta ke firderapa is xonukera ke jontik irubasik al kosmayad. Argishtikhinili gan Skutoi [19] saneik oku Mada ape zo vilayar. Debak leon toldecemdon kle lapteyer. [20][21]

Ref sok

Kolna ke tcila moe Argishtikhinili kesi

Vamoeon: zovdom va Argishtikhinili bak pelava.
Talteon: kimbas atcom ke Argishti I.

Mali tena ke joxara gadeyena gan A- Martirosyan bak 1970-e sanda, Argishtikhinili al zo videyer. Nelkafo suxayano joxaxo gu tawa di zo besayad. Lani folkayki isu cofuot zo ilempayad isen welma zo tuacayad. Moe Argishtikhinili kimbasa raporxa dem zovdom va pelavafa widava zo rundayar. Loa muka trasiyina koe Argishtikhinili den Sardarapat mikropafa tcila ke Armena di zo arbureyed.

Vuestexa

  1. 1,0 1,1 1,2 et 1,3 Khatchadourian, L. Norman Yoffee, ed. Unforgettable Landscapes: Attachments to the past in Hellenistic Armenia (kan  EN-). University of Arizona Press. p. 58. ISBN 978-081652670-3. Ruyera ba 13/09/2016. 
  2. Khorenatsi, Movses (1990). История Армении (History of Armenia) (kan  RU-). Yerevan: Айастан. ISBN 5-540-01084-1. 
  3. Boyajian, Zabelle C. (1916). Armenian Legends and Poems (PDF). London: J. M. Dent. Tusavs- male xanto ba 04/03/2016. Ruyera ba 13/09/2016. 
  4. 4,0 4,1 4,2 4,3 4,4 et 4,5 Мартиросян, А. А. (1974). Аргиштихинили (kan  RU-). Yerevan: Издательство Академии наук Армянской ССР. 
  5. Smith, A. T. (2006). «Prometheus Unbound: Southern Caucasia in Prehistory». Journal of World Prehistory. Karba 19. n° 4: 229-279. doi:10.1007/s10963-006-9005-9. 
  6. Nikolsky, M.V. Cuneiform Inscriptions from the Caucasus. Karba 5. Imperial Archaeological Society of Moscow. 
  7. 7,0 7,1 et 7,2 Boardman, John; Edwards, I. E. S.; Hammond, N. G. L.; E. Sollberger (05/08/1982). The Cambridge Ancient History. Cambridge University Press. ISBN 978-0-521-22496-3. Ruyera ba 13/09/2016. 
  8. «Pre-Urartian Armavir» (PDF). ISIMU: Revista sobre Oriente Próximo y Egipto en la antigüedad. Karba 7: 61. 2004. 
  9. Burney, Charles Allen; Sagona, A. G. (2004). A view from the highlands: archaeological studies in honour of Charles Burney. Peeters. pp. 206-207. ISBN 978-90-429-1352-3. Ruyera ba 14/09/2016. 
  10. 10,0 et 10,1 Меликишвили Г.А. (1960). Урартские клинообразные надписи. Moscú: Издательство Академии наук СССР. 
  11. Оганесян, К. А. (1955). Кармир-Блур IV, Архитектура Тейшебаини (kan  RU-). Yerevan: Издательство Академии наук Армянской ССР. 
  12. Alekseyev, Valery (1968). Contributions to the archaeology of Armenia. Peabody Museum of Archaeology and Ethnology. p. 15. Ruyera ba 13/09/2016. 
  13. Smith, Adam T. (2003). The Political Landscape: Constellations of Authority in Early Complex Polities. University of California Press. pp. 241-243. ISBN 978-052023750-6. Ruyera ba 13/09/2016. 
  14. Argishtihinili West (Detail) (kan  EN-). Project ArAGATS, University of Chicago. Tusavs- male xanto ba 13/06/2010. Ruyera ba 13/09/2016. 
  15. «The birds of ancient Armenia» (PDF). Acta zoologica cracoviensia. Karba 45: 406. 29/11/2002. Ruyera ba 13/09/2016. 
  16. 16,0 16,1 et 16,2 Aragats. Archaeology and Ethnography of Abkhazia. Tusavs- male xanto ba 12/01/2006. Ruyera ba 13/09/2016. 
  17. Арутюнян, Н. В. (1966). Новые урартские надписи. Издательство Академии наук Армянской ССР. 
  18. M. Chahin (2001). The Kingdom of Armenia: A History. Psychology Press. pp. 100-101. ISBN 978-0-7007-1452-0. Ruyera ba 13/09/2016. 
  19. Арутюнян, Н. В (1970). Биайнили (Урарту). Yerevan: Издательство Академии наук Армянской ССР. 
  20. Lehmann-Haupt, C. F. (1910–1931). Armenien, einst und jetzt (kan  DE-). Berlin: B. Behr. 
  21. Diakonov, Igor M. (2008). History of Media from the Earliest Times to the Late 4th Century B.C. (kan  RU-). Sankt Peterburg: St. Petersburg State University Faculty of Philology. 
Argishtikhinili
Ralmafi rawafi kesi ke Argishtikhinili
DEBALA
Debala Vema ke Armavir
Armena  
Maneka  40° 06′ 09" L-, 43° 59′ 18" R-
KIRA
Ord Urartu ralma
Welmot 10 km²
IZVA
Zabdura ≈ -776 AGJ
Jovlera ≈ -600 AGJ
Ayafe sare Urartu, Azilugal
  Tuveli icde Izvopa 
Carte
Tigixo ke Argishtikhinili debak
Urartu : savsugalafo gazaxo ke Pokefa Lenteka  
Gazik

ArameLutipriSarduri IIshpuiniMenuaArgishti ISarduri IIRusa IArgishti IIRusa IISarduri IIISarduri IVErimenaRusa IIIRusa IV

Debak

AltıntepeArgishtikhiniliArzashkunAyanisBastamErebuniRusahiniliSardurihiniliTeishebaniTushpa

Lorik

ArubaniHaldiHubaShiviniTeishebaTushpuea

Araya

UrartuavaAlkaYamba