Teishebani

Toltazukara va rebavega is tuvelap ke Teishebani Teishebani ( widava ke Teisheba, i ke lorik va xefto ) tir savsafa ralma ke Urartu. Vas noelaf debak ke Karmir-Blur poke Yerevan koe Armena vadjer. Gan Rusa II gazik bak taneafu amu ke VII-eafa decemda AGJ zo vegeduyur, ikaplekutuson va bulura va Erebuni vageroneon tigisi arte abice decitmetre. Widava tiyir kelu ke lentefa winka ke Urartu gazaxo ise va emaxe va warzeks dotayan wetce danuks abdi graskara van Tushpa idja ke gazaxo zanudayar. Zovdom va Teishebani Wid bak -590 gan Mada gejik vangluyayas gu Skutoy sane zo olgalicuyur nume zo guineyer aze zo kalanteyayar. Batcoba is bunesa dugapa ke cofuoteem va videranya va rawaks ke xo vengad. Divatce ke wid tiyir vas mon bar-sanoy decemiray. Zovdom al zo azedeyer numen sanelia zo inkeyer milinde batcoba koe Erebuni al zo askiyir. Ralma tice venta vamoe kuksa tigiyir. Inafe divatce tiyir gijafe gu mon balemoy decemiray. Kuskap isteon tigiyir lizo vansasik va ralma kolaniyid. Koeon mon 150 bonta tiyid : maxa is onya is nyofaxo is dere emaxo is olkxo is sinkaxo ta belcetara va koaykarsay dotayan ton danuks. Bana olkoba valente xe tigiyid. Woese ceke ke belcetaxoeem is gedrucapa ke katrasiyin warzeks ( zaipa is ilt is vor is punta is ekot ) va triguca ke gola ke Aras krant bak sare ke Urartu vrutad. Rebava ke anambe tiyid vafa gu mon 3 m- is ontinafa gu loon 9 m-. Kepaita kan ckane ke kovagalza zo vegeduyud. Lana rebava gu lenopa zo lingeyed. Ralma va zolonaf rawugol dem jontika trocadayxa isu iyekotafa kudja oku wulafa is iyekotafa imizxa isu azilafa al bilder. Va yon ristulaf valdig dere al razdar. Ralma va tanoy vegem zanudas va sokexo nudadiyir solve sidot va belcetara is skapafi fli ( onya is nyofaxo ) nelkon zanudayar. Rawaks is muka ke Teishebani Wiks va ki ke debak Wiks va rawaxoki Rawaks ke ralma Arak ke rebavega ke ralma Arak ke rebavega ke ralma Rebavegaki Nariltaf gort Drimula Oblakak ke Urartu Vapey ke Urartu sare Lorik ke sare abdi Urartu Moavayaf gadeluk trasiyin koe debak Vuestexa (en) Chahin, Mack (2001), The Kingdom of Armenia, Richmond, Curzon Press, ISBN 0-7007-1452-9 (en) Diakonoff, Igor (1988), The Pre-History of the Armenian People, New York, Caravan Books, ISBN 0-88206-039-2 (en) Piotrovskii, Boris (1969), The Ancient Civilization of Urartu, London, Cowles Book Co., ISBN 0-402-10171-5

Teishebani DEBALA Debala Karmir Blur, poke Yerevan Armena   Maneka  40° 09′ 14" L-, 44° 27′ 04" R- KIRA Ord Urartu ralma Welmot 0.44 km² IZVA Zabdura ≈ 650 AGJ Jovlera ≈ 585 AGJ Ayafe sare Urartu, Azilugal   Tuveli icde Izvopa