Fanni Kaplan

Fanni Kaplan

1890-1918

Rossiaf artowasik

Fanni Kaplan ( rossiavon Фанни Ефимовна Каплан ) tiyir rossiaf artowasik. Koe Novitci widama poke Xmelnitski koe savsafo rossiafo gindaxo is refa Ukraina ba 10/02/1890 kobliyir. Ba 03/09/1918 koe Moskva flioton is jiziskon zo klibur. Blirizva Yoltack ke Fanni Kaplan tiyir Feiga Xaimovna Roytblat ( rossiavon Фейга Хаимовна Ройтблат ), ke yudafa yasa dem peroy nazbeik. Arotievaf artowasik Fanni Kaplan koe Akatuy ke Nertcinsk stanjuxo, 1906 In gavepon vanpir artowasik ise dene arotievafa lospa sayudar aze va seltevafa lospa kazokever, i va Seltevafo Artowaso Pako. Bak santoleaksat ke 1906, do toloy ar arotievik va lagadjubera va bowesik va Kiyiv paker. Zo soper aze gu rezgalera ko Katarva kobaso stanjuxo koe Akatuy koe Sibiria zo lanzar. Wali 1908 is 1912 koe flint ke Maltsev koe Sibiria tigir lize lanzayan eaftevik al zo stakseyed. Zo dagir voxe do tev-sanoya ara seltevikya ik arotievikya zo gonokobar. Fanni toz akoleper ise dace nore toz tuwiiskawer. Lakser voxe zo giwar. Bak 1912 ko ropexe ke Akatuy zo arburer aze mali 1913 gin rodewir. Aze ko flint ke Akatuy kali 1917 gire zo kobuder. Lagadjubera va Lenin Bak Rossiafa Wideytageja, artowas seltevik va lagadjubera va Lenin ba 30 ke anyusteaksat ke 1918 grustad. « Jinaf yolt tir Fanni Kaplan. Va Lenin uleon al viltá. Ins askiyí. Me kalití lizu dierk malniyir. Va Lenin jontikedje djukuraytayá. Krupté da in tir zatkaf gu Artowara. Ko Akatuy zo divbliyí kire va lagadjubera va gindik koe Kiyiv al pakeyé. Va perda banlize tiskiyí ise olgon kobayá. Moi Artowara zo tunuyayá. Mu Tadlesa Koka tiyí ise wan tí. » — Fanni Kaplan Banviele Lenin va Mixelson iaxe koe Moskva worar. Viele va xe bulur ise va direm vanlanir, bam gan Fanni Kaplan zo powar. Viele vanon rwoder, pune bantan baron viltar. Tan vilt va lioza ke Lenin remnir solve ar toloy va taltefa epita is riz artnid. Lenin va intafa kraba ke Kreml ralma dimlapir. Va ara bilma kivar nume koe musuca ke ralma zavzagir. Kurmik va in banlize kevroped. Lenin di moblir. Fanni Kaplan zo soper aze gan Tceka gaderopaf ardial zo kalerur. Inafa viltaxa gan Boris Savinkov zo tiskayar. Ba 3 ke lerdeaksat ke 1918 jiziskon zo klibur. Koe kusk ke Tceka ardialxe zo xonukalier aze zo anteyar. Abdi xonukera dakter : « Va Lenin al viltá kire krupté da in va selteva al relmer isen inafa kruldera va selteva ewotar. Va bowere ke Samara is lyumara va Germana do vangluyanikeem en zobé. » Arti abic viel, Grigori Petrovski ramisavik ta koef arienteem va yona klibura koldar, dakteson : « Fiste va bata milduca isu pestakeva en gotenat !» Ba 5 ke lerdeaksat ke 1918, Pirdot dem saneramisavik va kexi tuwinugasi va kerafa eaftuca sanegar. Dere rupec ► Rossiafa artowasikya Vuestexeem

Fanni Kaplan  Koblira  10/02/1890,  Novitci, Ukraina  Awalkera  03/09/1918,  Moskva, Rossia  Vedeyot  Rossia  Tegira  Bilmas artowasik   Bifa  Seltevafo Artowaso Pako Xalta ke Akatuy Bilmara va Lenin, 1918   Tuveli icde Izvopa  Bilmara va Lenin, yunkeks ke Vladimir Ptcelin