Anna Pribilyova-Korba

Anna Pribilyova-Korba

1849-1939

Rossiaf artowasik

Anna Pavlovna Pribilyova-Korba koblirayoltafa gu Meinhardt ( rossiavon Анна Павловна Прибылëва-Корба, Мейнгардт ) tiyir rossiaf artowasik. Koe Tver koe savsafo rossiafo gindaxo ba 09/12/1849 kobliyir. Bak 09/12/1939 koe Leningrad koe TSSS awalkeyer. Blirizva Toza Anna Pavlovna Meinhardt koe Tver dene kulafa yasa ke Pavel Meinhardt kelotaf dritik is Ekaterina Koritskaya kobliyir. Yasa tiyir vey germanafa xanta ise vas tanoye berye is aluboya berya ( Maria is Yelena is Olga is Varvara is Viktorya ) ruldayar. Klepa ke gadikye vebayar da yasa jontikviele ogaruyur. Acum Anna koe Warszawa az Vladimir az Yaroslavl bliyir ise do pilkovaf tavesik ogon vayayar. Remi jotugal va rossiavaf suteroteem isu germanaf belipiyir. Ke dokobasikeem ke gadikye, Aleksandr Leschern tir ise va Maria taneafa berya ke Anna bak imwugal ke 1868 kurer. Kadimion Anna va Viktor Korba erbapirdasik xantaf gu Swiza rungruper aze bak santoleaksat ke mil ilanacek kurer. Tolonga va krabama ke Sankt Peterburg taneon koirubar, poke mona ke Leschern tolonga. Anna va berikya ke Aleksandr kevlanir, i va Sofia Leschern yordapatas va artowas lizor, az va Sofia Perovskaya is baroya Kornilova berikya is Olga Schleissner is aryon diref bewik ke Tcaykovski rijay. Kaikion, tolonga va glabafa krabapa keve Galernaya vawila koirubar. Va idulugal koe trapova koe Lesnoy deorxo ke Sankt Peterburg gitiskiyir, i koe trapova dokerelena do Leschern yasa. Sofia Perovskaya is Aleksandra Kornilova bak idulugal koe Lesnoy va int dere inkeyed. Bak 1870 is 1871 Anna koe ayikyafa opafa olda keve Griboyedov narilt vayayar. Gan Aleksandr Stranobyulski solokseropik yasegon tulon mbi taveyer. Bat tavera gan Maria Leschern is baroya Kornilova berikya is Sofia Perovskaya is mon sanoya ara yikya dere zo tcokeyer. Stranolyubski va izvopa is trakopa skeuyur ise tiyir kevusik va gindafa vertuma. Va Anna turestapayar. Anna is konaka nikya pu Nikolay Tcaykovski zo atoed. In va kevus seltom grustayar lize memwedafa neva zo sanegad ise zo amuzed. Voxen Anna Korba va inaf rijay banugale me yoter. Teni fentugal ke 1871 va dob ke kotla ke Sankt Peterburg kotaskir. Voxen kadimion, nope velitafa bituperaja ke Viktor Korba, tolonga gobozapar nume va morafa kraba ke widava gonarar. Kurenye va kobara dene ravaldasu sistu trasir. Bak idulugal ke 1872 ko Moskva zo stakser aze ko Minsk bak 1874. Artowasik ke Narodnaya Volya Bak imwugal ke 1877 geja wal Rossia is Turka vinustar. Bata geja ton tegira gotunuyasa va yone Slava sane gu turkafa felira zo atoer. Anna va pomas selasik mbi taver aze bak santaneaksat ke 1877 kak redjel mallapir ise tciceteson va bakanik koe sayakafe ropexe koe Romania kozanir. Bata gorara kev kurenye va sintafa skeda kidar. Geja bak toleaksat ke 1878 tenuwer voxen Anna arbureteson va bakanikeem kali alubeaksat koe gola zavzagir. Bam va Aleksandr Volkenstein jotaf kurmik ixam askoayan gu Jiz ke 193 ke Sankt Peterburg. Ban in va kiavara ke Sofia Leschern dear ise icde gaderopaf bifeem koe Rossia givar. Koe kelu is arak ke patecta, jiz va Vera Zasulitc al lorapar. Anna Korba ko Sankt Peterburg dimlapir. Banvielu va artowas lizor vonewes koe Rossia djukuvilter. Bak alubeaksat ke 1879. Gu kurenye va int griuziar. Va Maria Ocanina kurenik ke Aleksandr Barannikov artowasik kakever aze va Morozov is Sofia Ivanova is Gesya Gelfman is Kvyatkovski is Tixomirov toz paskaler. Va Narodnaya Volya grustaks tazukad. Anna vanpir bewik ke skusa neda bak taneaksat ke 1880. Va bunera va azed grustan gan Narodnaya Volya is gedira va birgotaf krabeem is turolara va remeluxaxa is moekote sutelara va virda ke grustaks paker. Radimi lagadjubera va Aleksandr II gindik ba 13/03/1881, moblis arak ke Narodnaya Volya koe Moskva va int palser. Bak taneaksat ke 1882 Anna Korba ko Sankt Peterburg dimlapir. Ba 17/06 koeon zo soper. Jiz az xalta az divblira Jiz va 17 ke Sankt Peterburg (1883) Jizanik Богданович, Юрий Николаевич — Yuri Bogdanovitc — Parmafa xalta ta poana kobara Борейша, Антон Степанович — Anton Boreyco — Divblira koe Sibira Буцевич, Александр Викентьевич — Aleksandr Butsevitc — Parmafa xalta ta poana kobara Грачевский, Михаил Фёдорович — Mixail Gratcevski — Parmafa xalta ta poana kobara Гринберг, Христина Григорьевна — Xristina Grinberg — Divblira koe Sibira Гроссман, Раиса Львовна — Raisa Grossman — 15 xaltafa tanda ta poana kobara Златопольский, Савелий Соломонович — Saveli Zlatopolski — Parmafa xalta ta poana kobara Ивановская, Прасковья Семёновна — Praskovya Ivanovskaya — Parmafa xalta ta poana kobara Калюжный, Иван Васильевич — Ivan Kalyujni — 15 xaltafa tanda ta poana kobara Клименко, Михаил Филимонович — Mixail Klimenko — Parmafa xalta ta poana kobara Прибылёва-Корба, Анна Павловна — Anna Pribilyova-Korba — 20 xaltafa tanda ta poana kobara Лисовская, Антонина Игнатьевна — Antonina Lisovskaya — 15 xaltafa tanda ta poana kobara Прибылёв, Александр Васильевич — Aleksandr Pribilyov — 15 xaltafa tanda ta poana kobara Смирницкая, Надежда Симеоновна — Nadejda Smirnitskaya — 15 xaltafa tanda ta poana kobara Стефанович, Яков Васильевич — Yakov Stepanovitc — 8 xaltafa tanda ta poana kobara Теллалов, Пётр Абрамович — Pyotr Tellalov — Parmafa xalta ta poana kobara Юшкова, Мария Александровна — Maria Yuckova — Divblira koe Sibira Kofinon gu Jiz va 17 ke Sankt Peterburg bak balemeaksat ke 1883, gu tolsanda ke poana kobara koe Sibiria zo lanzar. Kadimion bata gakera gu 13 tanda is 4 aksat zo kastar. Ko xalta ke Kara zo stakser. Bak lerdeaksat ke 1890 va xalta ronobulur aze koe Ust-Ilinski wida zo stanjur. Bak 1894 va Viktor Korba solkurer aze va divblixof dositik Aleksandr Pribilyov yerumar. Bak santaneksat ke 1897 sin ko Blagovectcensk zo arbured lize va Asya nazbeik ke awalkeyes flintik tubronazbead. Arti tena ke gakera bak toleaksat ke 1905 ko Odesa az Moskva koirubad. Bak taneafa rossiafa artowara va Seltevafo Artowaso Pako yoted. Bak 1909 zo soped nume ko Minusinsk toldon di zo divblid. Kaiki Artowara ke Saneaksat, Anna Pribilyova-Korba tiyir bewik ke Seltom ke savsaf gaderopikaf daginik isu divblinik is tan nelkaf webesik va Katorga is Ssilka virda. Ba 09/12/1939 koe Leningrad awalkeyer aze ko Volkovo awalkikxo poke kurenik zo kotawayar. Dere rupec ► Rossiafa artowasikya Vuestexeem (ru) «Народная воля»: Воспоминания о 1870—1880-х гг." С приложением планов тюрем на Каре и 4 портретов М.,1926 (ru) Neva «Народовольцы». М.,1931 (ru) Fela «Каторга и ссылка» (1934. Кн. 4) (ru) Fela «Каторга и ссылка» (1934.Кн. 5\6) (ru) «Сибирские записки». 1917. № 2 — о сибирских встречах; (ru) "М. Е. Салтыков-Щедрин в воспоминаниях современников: В 2 т. М.,1975. (ru) «Русские записки» (1916. № 9. С.103-112) — «Отрывок из воспоминаний: (В Красноярске в 1909 г.)»; (ru) «Русское богатство» — о П. Ф. Якубовиче (1912. № 10. С. 57-75); (ru) «Мои воспоминания: О Каре» (1914. № 3. С. 130—150). (ru) Fela «Былое» (1906) — Корба А. П., Корба, Анна.; «Былое», 1906. (ru) Прибылева-Корба, А. Автобиография, Петроград — в Энциклопедическом словаре братьев Гранат Т. 40

Anna Pribilyova-Korba  Koblira  09/11/1849,  Tver, Rossia  Awalkera  09/12/1939,  Leningrad, Rossia  Vedeyot  Rossia  Tegira  Galbedus artowasik is selasik   Bifa  Narodnaya Volya grustaks Seltevafo Artowaso Pako Kara xalta   Tuveli icde Izvopa  Naboxa ke Anna Pribilyova-Korba koe Sankt Peterburg