Maria Ckolnik
1882-1955
Rossiaf artowasik

Maria Markovna Ckolnik ( rossiavon Мари́я Ма́рковна Шко́льник ) tiyir rossiaf artowasik. Koe Borovoy Mlin widama poke Smargon ke Vilnius bowexo koe savsafo rossiafo gindaxo az refa Belarusa ba 06/03/1882 kobliyir. Ba 09/04/1955 koe Moskva awalker.

Blirizva betara

Toza betara

Maria tiyir nazbeikya ke yudafa yasa blisa koe Borovoy Mlin widama poke Smargon banugale tigisa koe Vilnius bowexo ke rossiafo gindaxo. Va konakar berik dikiyir. Yasa tiyir wawapafa numen Maria kali sanbarda zavzayar olutafa.

Jotapafa koe oksionya toz kobar. Ba sanalubda, radimi yastera is dewitca ke sayudasik ke Bund grustaks, va artowas lizor kakever. Va intafa wida bulur aze va Odesa koinker lize nuyotafa anameda iku artowasa ixam tid zolonafa is turestafa. Koe blotiaxe kobar.

Taneafa sopera betara

Maria Ckolnik tir ke artowas seltomam amuzes va birgotaf galbeduks isu fela. Bak toleaksat ke 1902 do Cpayzman palik taneatomon zo soper. Susik ke flint lize tir kobudeyen tid udutaf is askipejes. Do konak artan tarler nume ko estesa sogza zo aykar.

Inaf jiz bak santaneaksat ke 1903 koe Odesa dilizer. Ckolnik is palikeem zo lanzad, gu zelara va wideyarokeem is divblira koe Sibiria. In koe Aleksandrovskoye widama di goblir.

Bak 1905 moi Artowara ke Toleaksat Maria Ckolnik il divblixo yater. Do pintafe nazbeikye is pomanon gan yasa ke dositikye, va Rossia lajubulur aze va Genève koe Swiza artlapir lize konak zolonaf gadesik ke Seltevafo Artowaso Pako banugale tigid.

Pakera va birgotafa lyumara betara

Koe Genève, Ckolnik va Aaron Cpaizman dere yateyes il Sibiria katrasir. Savinkov is Azev okilik ke SAT va bilmara koe Rossia vuidad. Batenide sin va Trepov jadiwik taneon labilmad voxe tined. Sinafa toleafa jala tir Kleigels jadif bowesik va Kyiv, voxen gire rodjed.

Ba 01/01/1906 va Xvostov bowesik va Tcernigov bilmad. Cpaizman va taneafa aora meedavesa kevkabur azen Ckolnik va toleafa. Xvostov zo bakar voxen dere miv Ckolnik. Soe lajupotcer voxe kadimion buluson va widava do Yaca Leykina palikya di zo soper.

Ckolnik is Cpaizman is Leykina gan sayakaf erkey zo komalyed. Ckolnik is Cpaizman zo xonukalanzad. Soe gakera ke Maria Ckolnik gu parmafa poana kobara koe xalta zo nuner.

Xalta ke Nertcinsk betara

Teva koe divblixo ke Akatuy : Maria Spiridonova, Maria Ckolnik, Anastasya Bitsenko, Aleksandra Izmaylovitc, Rebekka Fialka, Lidya Ezerskaya

Koe Butirka flint, Ckolnik do konakara nuyevafa artowasikya zo kalospar : Maria Spiridonova is Lidya Ezerskaya is Aleksandra Izmaylovitc is Anastasya Bitsenko is Rebekka Fialka. Sinya va cesterkateva ) belcon fu zo dayoltad. Viafa koyara kan impadimak kal sumefa xalta poke Tcita is siniafa jowa va tanoy aksat tiskir. Koe kota recela luntafi tari mu lanzanik exaksar. Bak pereaksat ke 1906 gu Akatuy ke Nertcinsk zo koxaltad.

Tozion, dagisa gropeem koe Akatuy tir koxackaf, voxen bak fentugal ke 1907 ko Maltsev flint zo arbured lize tid antafa gaderopafa daginikya ke flintikeem. Gropeem tid loeke olgapaf.

Bak idulugal ke 1910 Ckolnik ve akoler nume zo gotcobar. Acum ko Irkutsk zo arburer voxen remi tandacku gonoker. Tcobara tir kiewatcafa. Kadimion Maria ayikyekoron vagekirafa div flint lajuyater. Tuke jontika dofugaca taneon va int lajupreyutar aze ko Mandjua lajulapir. Azon kal Europa az Amerika koyar.

Kaikifa blira betara

Bak 1924 ko TSSS tere dimlapir lize va konaka bema koe Moskva redur. Bak 1927 va Doevafo Pako yoter. Mali 1935 wetce rumeagaaropik kobar.

Ba 09/04/1955 awalker.

Dere rupec betara

Rossiafa artowasikya

Vuestexeem betara


Maria Ckolnik

Maria Ckolnik

 Koblira  06/03/1882,
 Borovoy Mlin, Belarusa
 Awalkera  09/04/1955,
 Moskva, Rossia
 Vedeyot  Rossia
 Tegira  Bilmas artowasik
  Bifa 
  Tuveli icde Izvopa 

Varvara AleksandrovaMaria AnaninaNatalya ArmfeldAlyona ArzamaskayaSofia BardinaFanya BaronEkaterina BartenevaVarvara BatyuckovaAnastasya BitsenkoSofia BogomoletsAnisya BolotinaEkaterina Brecko-BreckovskayaMaria CkolnikLidya EzerskayaRebekka FialkaLidya FignerVera FignerYevgenya FignerGesya GelfmanEmma GoldmanXristina GrinbergRaisa GrossmanSofia Ivanova-BoreycoAleksandra IvanovskayaEvdokia IvanovskayaPraskovya IvanovskayaAleksandra IzmaylovitcMaria KalyujnayaFanni KaplanNatalya KlimovaNatalya Kogan-BernsteinZinaida KonoplyannikovaMaria KovalevskayaElizaveta KovalskayaYulya KrukovskayaMaria KutitonskayaTatyana LebedevaSofia LeschernOlga LyubatovitcVera LyubatovitcFani MoreinisMaria NikiforovaSofia PerovskayaAnna Pribilyova-KorbaAnna RasputinaYevgenya RatnerNeonila SalovaNadejda SigidaNadejda SmirnitskayaMaria SpiridonovaMaria SubbotinaNadejda SubbotinaYevgenya SubbotinaOlga TaratutaLyudmila TerentyevaAnna ToporkovaMaria VetrovaLyudmila VolkensteinAleksandra XorjevskayaAnna YakimovaVera Zasulitc