Fani Moreinis-Muratova

Fani Moreinis-Muratova

1859-1937

Rossiaf artowasik

Fani Abramovna Moreinis yer-kirafa gu Muratova ( rossiavon Фани Абрамовна Морейнис, Муратова ) tiyir rossiaf artowasik. Koe Mikolayiv koe savsafo rossiafo gindaxo is refa Ukraina bak 1859 kobliyir. Bak 1937 koe Moskva koe TSSS awalkeyer. Blirizva Fani Moreinis dene kulafa yudafa yasa koblir. Veygadikye tiyir kotgrupaf totiasik isen dolekuca ke gadikye tiyir divburera va denta is regelta ; tiyir febaf tarkasik va nelkoteem ke yudafa alka. Numen inafa gaara tiyir gruadon nilafa is volsuptafa. Fani va rossiaf suteroteem to aun kosmayar. Bak 1875 do Xristina Grinberg kosayya va konak saneevaf korik aun kevlaniyir nume va bat rieteem toz dulapeyer. Va ayikyaf selaropaf kizey ke Sankt Peterburg djudenfiyir. Va Saveli Zlatopolski artowasik isu Salomon Wittenberg rungruper. Djupaskaleson va dodelafa pula, Fani Moreinis do Xristina vanpir vukus dodelik koe iaxe ke Mikolayiv aze bak taneaksat ke 1878 va Odesa koirubar lize va artowas blay gaden gan Ivan Kovalski denfir. Sin koe vukudiaxe kobad. Ba 11/02/1878 Kovalski is konaktan teni zeltara do ardial zo soped. Xristina Grinberg bam tubirgotawer. Neken Fani Moreinis volaun wan galbedur ise va biun sanegaks wan amuzer ise va gaderopikaf daginik daalar. Va Narodnaya Volya grustaks yoter. Bak idulugal ke 1880 koe Odesa az Sankt Peterburg do Kibaltcitc bewik ke skusa neda ke grustaks is Anna Yakimova, va egara va bilmara va gindik kan divroidaxa paker. Moi adjubera va gindik ko Odesa dimlapir aze va Kyiv levirubar lize ba 06/05/1881 do Anna Yakimova is Langans zo soper. Kali toza ke 1883 koe konak flint zo dagir. Aelyaster. Ba 03/04/1883 bal Jiz va 23 gu balemda ta poana kobara gan sayakaf erkey ke Odesa zo lanzar. Ko xalta ke Kara koe Sibiria zo stakser. Teni xaltugal koe Kara, Fani Moreinis koe Tcita zo stanjur lize va Muratov utcaf selaropik di yerumar. Azon tolonga koe Goryacinskoye wida kene Baikal uzda zo stanjur lize sandon di blir. Sin va palsera va yatesik is divblinik pomad. Bak 1907 do nazbeikeem va Moskva rokoirubar. Azon, wali 1916 is 1924 koe Irkutsk dene nazbeikye soker. Fani Moreinis-Muratova bak 1937 ba megrupena evlacka koe Moskva awalker. Dere rupec ► Rossiafa artowasikya Vuestexa (ru) Автобиография Морейнис-Муратовой Ф. А., Автобиографии революционных деятелей русского социалистического движения 70-80-х годов, Энциклопедический словарь Гранат. (ru) Морейнис-Муратова, Фанни Абрамовна, Большая русская биографическая энциклопедия, М.: Бизнессофт, ИДДК, 2007.

Fani Moreinis-Muratova  Koblira  1859,  Mikolayiv, Ukraina  Awalkera  1937,  Moskva, Rossia, TSSS  Vedeyot  Rossia  Tegira  Galbedus artowasik   Bifa  Narodnaya Volya grustaks Kara xalta   Tuveli icde Izvopa  Xe koe xalta ke Kara, 1891