Maria Nikiforova

Maria Nikiforova

1883-1919

Rossiaf is ukrainaf artowasik

Maria Grigoryevna Nikiforova ( rossiavon Мария Григорьевна Никифорова is ukrainavon Марія Григорівна Нікіфорова ) tiyir ukrainaf is vedeyon rossiaf artowasik tegis wetce tan okilik ke arotievaf lizor bak Wideytafa Geja koe Ukraina. Bak 1883 koe Aleksandrovsk kobliyir aze ba 16-24/09/1919 koe Sevastopol zo klibuyur. Blirizva Ewava va Aleksandrovsk teni XIX-eafa decemda, i va koblisa widava ke Nikiforova Maria Nikiforova koe Aleksandrovsk widavama ( re Zaporijya ) vagee Ukraina bak 1883 ok 1885 kobliyir ise tiyir nazbeikya ke gradilaf savsaf fayik ke rossiaturkafa geja ke 1877-1878. Mali tevsandafa klaa dene arotidoevaf rijay ke gola toz nobar ise sayudar. Bak 1906 gan gindaf ardial zo gralomer aze gu xonukera zo lanzar. Inafa gakera gu parmafa koflintara kadimion zo nuner. Taneafa tanda ke gakera koe Petropavslovskaya ralma ke Sankt Peterburg zo tiskid aze bak 1910 ko Sibiria zo rezgaler. Banlizu kal Nipona lajupotcer. Azon koe Tanarasokeem az Espana jonvieler aze ko Paris koe Franca tere koirubar. Koe francafu kelu va Witold Brzostek polskafe arotievikye yerumar. Runi Taneafa Tamavageja dum Pyotr Kropotkin ko pemaxo djumaltegiso va geja kev Germana va int plekur. Den francafa ervolia vilter aze wetce fayik koe Balkan gola keve makedoniaf redjel lyumar. Maria Nikiforova bak imwugal ke 2017 ko Aleksandrovsk koe Ukraina gin tigir aze va kiewega ke bowere is fayik ke gindafa ervolia is pilkotik ervokiron gin molyumar. Bak idulugal ke mil ilanacek va Kirovograd zonoster ise va arotievaf Ebeltaf Lyumasiktum grustar. Inafa doalierinda va Nestor Maxno droler numen ina va delafa dokobasa paskalera doon di exoner. Djukudilfuson va leceem ke gindafi roti, bak anyusteaksat ke 1917 va vangira va Orixiv widava paker. Tegira zo kaliafa is keskotafa. Tazdaks ke sayakaf milk sagaf gu gindik tid zolonaf. Bata dilfura jupayar da ervoliama ke Nikiforova va jontik werk isu kopaasleso ervo dimnariyir. Kiewatca ke Ebeltaf Lyumasiktum ke Maria Nikiforova va tula mu arotievaf lyumasik tsunetes va ilamuca is tizuca ke Bolcevik roti di zanudad. Bat gejelus blay mali imwugal ke 1918 toz tid keskotapaf numen Bolcevik rictaga pendaropon govoponar ise va sinafa tegira dace sisker larde arotievik is doevik tid kev mi volnik : batakaf kevtegirevik. Voxen bata tilacka bak mielcek ke 12 ke balemeaksat ke 1918 zo mojoar viele Bolcevik milk va mon san-baroyo arotievaxo koe Moskva ruzaded. Lo 50 arotievik zo aykad isen lo 500 zo koflintad. Bak 1919 vangluyanon do Maxno, Nikiforova va konak azed ta tunuyara va yon daginik div flint ke Xarkiv envar. Ise va Denikin koe Rostov ik Koltcak koe Sibira volmiv lasugadjuber, i va okilik ke batakafa ervolia. Voxe do yerumanye gan milk sagaf gu batakafi roti zo gralomer. Sin koe Sevastopol bak 16 ke lerdeaksat ke 1919 ( ok 24/09 ) zo klibuyud. Dere rupec ► Rossiafa artowasikya Vuestexa (en) Palij, Michael, The Anarchism of Nestor Makhno, 1918-1921. Seattle, WA. United states: University of Washington Press, 1976. ISBN 0-295-95511-2. (en) Skirda, Alexandre, Nestor Makhno: Anarchy's Cossack, the struggle for free Soviets in the Ukraine 1917-1921, Oakland, Ca. United States: AK Press, 2004. ISBN 978-1-902593-68-5. (en) Archibald, Malcolm, Atamansha: the Story of Maria Nikiforova, the Anarchist Joan of Arc. Dublin: Black Cat Press, 2007. ISBN 978-0-9737827-0-7. (ru) Чоп В. М. Маруся Никифорова. — Запорожье: РА “Тандем-У”, 1998. (ru) Blirizva ke Maria Nikiforova dene Makhno.ru internetxo

Maria Nikiforova  Koblira  1883,  Zaporijya, Ukraina  Awalkera  16-24/09/1919,  Sevastopol, Ukraina  Vedeyot  Rossia  Tegira  Lyumas artowasik   Bifa  Arotieva Rossiafa wideytafa geja   Tuveli icde Izvopa    Tuveli icde Arotieva  Nestor Maxno ar arotievaf andik milugale lyumas koe Ukraina